9, మే 2021, ఆదివారం

సకలార్తిశమనచణము

 సకలార్తిశమనచణము శ్యామసుందరరూపము

ప్రకటించెడు గాక రక్ష రామదయా రూపము


మునుల మోహపరచినట్టి యినకులేశురూపము

మనసులోన ధ్యానింతును మరువకేనెపుడు

జనకజావదనసరోజాప్తరవిబింబుమును

తనివితీర ధ్యానించెద ననయమేను


హరచాపఖండనమనోహరవీరరూపము

పరశురామగర్వభంగకరశుభరూపము

సురవరోధికంఠలుంఠన ఫరమవీరరూపము

తరచు ధ్యానింతు రఘువరుని రూపము


శివుని మనసులోనల్చి చిందులు త్రొక్కురూపము

భవపంకవిశోషణఘనభానునిరూపము

త్రివిధతాపములనణంచు దేవదేవుని రూపము

వివిధగతులసుజనులకు వేడ్కగొల్పు రూపము