30, నవంబర్ 2020, సోమవారం

మా చెల్లెలు అరుణ రచించి పాడిన తెలంగాణా జానపద గీతం

 

 

ఓ మావ జర ఇ నే..

దండ లోని దారమల్లె ఓ మావా
మన  బంధముండి పోవాలి ఓ మావ
పాలు తేనె లెక్క ఓ మావ
మనం కలసి మెలసి ఉండాలి ఓ మావా


ఊపమంటే  ఊపవు ఉయ్యాల
నే ఉసులెట్టా సెప్పాలా ఇయ్యాల
ఉలకవు పలకవు ఈయెళ
నీ అలకే ట్టా తీర్చేది ఇయ్యాల
ఓహో మావ... ఓ బంగారి మావా

సక్కాని సుక్కను నేనైతే
నా నిండు సందమామ  నువ్వు కదా
రంగుల హరివిల్లు నేనయితే
కురిసేటి కరిమబ్బు నువ్వు కదా
ఓహో  మావా.. ఓ బంగారిమామ

అడుగుల అడుగేసి నీవెంట
నే ఏడడుగులు మరి నడవాలా
ఊరంతా పందిరేసి సెయ్యాలా
మన పెండ్లి వేడుకలు చోద్యంగా
ఓహో మావ.. ఓ బంగారిమామ

ఈ పాట రచన, గానం మా చెల్లెలు అరుణవి. 

మా చెల్లాయి పాట కాబట్టి నాకు బాగుంటుంది సహజంగా. బాగా పాడింది అనిపించి నలుగురికి తెలియజేసి ప్రోత్సహించాలన్న దృష్టితో ఆమె పాటను నా బ్లాగుద్వారా కూడా పరిచయం చేస్తున్నాను.

తను చాలా చిన్నపిల్లగా ఉన్నప్పుడే బాగా పాడుతున్నదని అనిపించి కొన్ని చిన్న చిన్న పాటలు నేర్పి పాడించే వాడిని. అంతకంటే నేను తనకి చేసింది ఏమీ లేదు.

స్వయంగా తనకళను తానే అభివృధ్ధి చేసుకుంది.

ఇప్పుడు స్వయంగా పాటలు వ్రాసుకొని పాడుతున్నది అంటే చాలా సంతోషం కలిగింది.

ఈ పాట వెనుక పూర్వాపరాలు నాకు అంతగా తెలియవు. నాకు పంపితే విని బాగుందనిపించి కొన్ని వివరాలు అడిగి తెలుసుకున్నాను.

ప్రొద్యూసర్ గారి పేరు రమణ ప్రసాద్.  మ్యూజిక్ డైరక్టర్ పేరు డేవిడ్. వీడియో ఎడిటర్ సింహ అని చెప్పింది.

ఆసక్తి కలవారు ఈపాటను విని అమె పాటను యూ-ట్యూబ్ ఛానెల్ లింక్ వద్ద లైక్ చేసి ప్రోత్సహించండి.

తనకు తెలంగాణా మాండలికం మీద మంచి పట్టు ఉన్నది. 

చాలా కాలం క్రిందట, అప్పుడు తాను స్కూలు పిల్లగా ఉన్న రోజుల్లోనే ఒకసారి ఒక చిన్న సంఘటన. ఎవరో బయట అరుగుమీద ఇద్దరు ముగ్గురు అమ్మాయిలు మాట్లాడుకుంటున్నారు. ఫక్తు తెలంగాణా మాండలికంలో. అందులో విశేషం ఏమీ‌ లేదు కాని అందులో ఒక గొంతు మాత్రం బాగా పరిచయం ఉన్న గొంతులాగా అనిపించింది. బయటకు వచ్చి చూస్తే స్నేహితురాళ్ళతో‌ అరుణ కబుర్లాడుతున్నది తెలంగాణా యాసలో. 

కబుర్లు పూర్తై ఇంట్లోనికి వచ్చాక అడిగితే, వాళ్ళకి మన ఆంద్రాభాష అర్ధం‌ కాదు అందుకని ఫ్రెండ్స్‌తో వాళ్ళభాషలోనే‌ మాట్లాడుతాను అని చెప్పింది.

అలా చిన్నప్పటినుండి,  హైదరాబాదీ అమ్మాయే అరుణ. అందుకని ఇదం‌ బ్రాహ్మ్యం ఇదం క్షాత్రం అన్నట్లు మాతో ఆంద్రా యాసలోనూ ఇతరత్రా అవసరమైనప్పుడు తెలంగాణా యాసలోనూ ధారాళంగా మాట్లాడుతుంది.

ఇదిగో ఇప్పుడు తెలంగాణా బాణీ  మాండలికం పాటలూ పాడుతోంది. పాడటమే‌ కాదు వ్రాసి మరీ పాడుతోంది.

ఈ పాటను తను పది నిముషాల్లో వ్రాసిందట.

 


8 కామెంట్‌లు:

  1. ఏ బాషనైనా మాండలికాన్నైనా పిల్లలు స్త్రీలు తొందరగా నేర్చుకుంటారు, వినలేకపోయా,పాటను అక్షర బద్ధం చేస్తే నాలాటివాళ్ళకి కొంత బాగుంటుందేమోనని ఆశ :)అభినందనలు తెలపండి

    రిప్లయితొలగించు
    రిప్లయిలు
    1. శర్మ గారూ మీ అభినందనలకి మనస్ఫూర్తిగా ధన్యవాదాలు తెలియజేసుకుంటున్నా ఈ బ్లాగు ద్వారా.🙏

      తొలగించు
    2. మిత్రులు శర్మగారు,
      అరుణ అందిచ్చిన ఈపాట సాహిత్యాన్ని కూడా కొద్దిరోజుల క్రిందటనే టపాలో చేర్చాను. కాని ఈవిషయం మీదృష్టికి తెచ్చినదీ‌ లేనిదీ గుర్తు లేదు (ముసలివాణ్ణై పోతున్నాను కదా!) అరుణపాటకు యూట్యూబ్ వద్ద కూడా మంచిస్పందనయే వస్తున్నది.

      తొలగించు
    3. అరుణగారు
      సాహిత్యం బాగుంది. మాలా పాట వినలేనివారి కోరిక తీర్చినందుకు ధన్యవాదాలు.

      తొలగించు
    4. శ్యామలీయం వారు,
      నిజంగానే మీరు నా కంటే ముసలాళ్ళయిపోయారు :) ఒప్పేసుకున్నాను.

      తొలగించు
  2. పాట బాగుందండీ. మీ చెల్లెలు హుషారుగా పాడారు కూడా 👌. పైగా తన స్వీయరచన కూడానూ. Good. మా అభినందనలు అందజేయండి.

    మా ఒక తమ్ముడి భార్య కూడా తెలంగాణా యాస మీద పట్టు కలిగిన వ్యక్తే స్కూలు చదువు నుండీ ఇక్కడే చదువుకోవడం మూలాన. మామూలుగా ఆంధ్రా శైలిలో మాట్లాడుతుంది, మాట్లాడుతూ మాట్లాడుతూ మరునిమిషంలో తెలంగాణా యాసకు మారగలదు - ఏదో స్విచ్ వేసినట్లుగా 🙂.

    రిప్లయితొలగించు
    రిప్లయిలు
    1. విన్నకోట నరసింహారావు గారికి ధన్యవాదాలు అండి.మీకు నా పాట నచ్చినందుకు చాలా సంతోషం అండి.మీ కామెంట్ యూట్యూబ్ లో చాలా చక్కగా వ్రాసారు.మీరు చాలా ప్రోత్సాహకరంగా వ్రాసారు.మీ మాటలు మంచి ఉత్సాహాన్ని నింపాయి.మీరు ఇలా పరిచయమవడం నా ఆదృష్టంగా భావిస్తున్న.మరొక్కసారి ధన్యవాదాలు తెలియజేసుకుంటున్నా

      తొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.