4, నవంబర్ 2016, శుక్రవారం

ఇతడే భగవంతుడని యెఱుగుడు మీరు


ఇతడే భగవంతుడని యెఱుగుడు మీరు
చతురులై కొలిచి ముక్తి సాధించుడు

జ్ఞానస్వరూపుడు జ్ఞానప్రదాయకుడు
దేనిపైన రాగమును పూననివాడు
తానె జగదీశ్వరుడై తనరెడువాడు
మానిత సత్కీర్తిపరుడు మారాముడు
ఇతడే

దానవారి ధర్మసంస్థాపనాచార్యుడు
పూని యార్తుల నెల్ల ప్రోచువాడు
మానవోత్తముడు సర్వమంగళవిక్రముడు
జానకీవిభుడు భువనసంరక్షకుడు
ఇతడే

సిరులకు నెలవితడు శ్రీనివాసుడు
సిరులుపంచు శ్రీనిథి చిన్మయమూర్తి
సిరులకు సిరియైన మోక్షశ్రీ నిచ్చువాడు
పరమాత్ముడు రాముడు భగవంతుడు
ఇతడే


1 వ్యాఖ్య:

  1. ఐశ్వర్యస్య సమగ్రస్య వీర్యస్య యశస శ్శ్రియ:
    జ్ఞాన వైరాగ్య యోశ్చైవ షణ్ణాం వర్గో భగస్మృత:

    ఐశ్వరమూ, పరాక్రమమూ యశస్సూ, సంపదా, జ్ఞానమూ, వైరాగ్యమూ అనే యీ‌ ఆరింటికీ ఉమ్మడిపేరు భగము. ఈ భగము అనే లక్షణము కలవాడు భగవంతుడు. దయచేసి ఈ‌మాటల అర్థాలను కొద్దిగా లోతుగా యోచించుకోవాలి. ఇక్కడ ఐశ్వర్యం అంటే డబ్బు దండిగా ఉండటం‌ అని కాదు అర్థం. ఈశ్వరుని యొక్క తత్త్వం‌ ఐశ్వర్యం. ఇత్యాదిగా యోచించుకోవాలి. ఈ వర్గానికి సూచనారూపకంగా ఈ‌కీర్తన వచ్చింది.

    ప్రత్యుత్తరంతొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.