13, సెప్టెంబర్ 2022, మంగళవారం

ఎవరి మాట లెటు లున్న

ఎవరి మాట లెటు లున్న నేది నీమాట నా
కెవరయ్యా నీకన్న నెక్కువ రామా

పవలురేలును నీదునామము వదలని వాడ ఈ
భువిని కాదా దివిని గూడను భూరికృపాళో ఓ
పవనసూనుసమర్చితం బును పరమపావనము ఈ
భవరుజాంతక మైన నామము వదలనే కాదా

పదుగు రాడెడు మాట చెల్లగ వచ్చునీ భువిని ఆ
పదుగురును నను తెగడి యెగ్గులు పలికితే నేమి ఓ
సదయ నీకృప నేను బడయగ జాలితి నేని నా
మదిని నిన్నే నమ్మియుంటిని మాటలాడవయా

ఎవరి మెప్పును కోరబోనే యెఱుగవా నీవు నే
నెవరి తప్పుల నెంచబోనే యెఱుగవా నీవు న
న్నెవరు మెచ్చిన మెచ్చకున్నను యించుకంతగ ఓ
భువనమోహన నీవుమెచ్చిన మురిసెదను గాదా



కామెంట్‌లు లేవు:

కామెంట్‌ను పోస్ట్ చేయండి

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.