21, సెప్టెంబర్ 2022, బుధవారం

వ్యామోహములు చాలు నయ్యా

వ్యామోహములు చాలు నయ్యా యికనైన

రామ రామా యన రాదా


కామితవరదుని కమలదళాక్షుని

రాముని కొలువగ రాదా

స్వామి కటాక్షము చాలును నాకని

నీమది నెంచగ రాదా


ఏది శాశ్వతమై యెసగును జనులకు

మేదినిపై నన రాదా

వేదవేద్యుడగు వెన్నుని తలచుచు

మోదము నందగ రాదా


రవికులతిలకుడె రక్షకుడన్నది

భువినిప్రసిధ్ధము కాదా

భవతారకమగు పావననామము

నవలంబించగ రాదా