9, సెప్టెంబర్ 2022, శుక్రవారం

శ్రితజనపోషక మము నీవే రక్షించవలయు రామా


శ్రితజనపోషక మము నీవే రక్షించవలయు రామా
చ్యుతి లేనట్టి పదంబు నొసగి యచ్యుత రక్షించవయా

రామా మేఘశ్యామా నిన్నే మేము నమ్మి నాము నీ
నామామృతమును గ్రోలుచు మహదానందము పొందేము
కోమలనీలసరోజశ్యామా భూమిసుతారమణా ఓ
శ్రీమద్దశరథనందన మమ్ము చేరదీయవయ్యా

నాలుగుదిక్కుల నీజయగాథలు నవ్వుచు చదివేము ధర
నేలెడు ప్రభువన నీవే నన్నది నిజమని చాటేము
కాలంబునకు నిలచిన యశమును గలిగిన శ్రీరామా మా
నాలుక లెప్పుడు నీకీర్తనలే‌ యాలపించు చుండు

భవసాగర మీదుట యన్నది మా వలన గాదు కనుక నీ
భవతారకమగు శుభనామమునే వదలక నుడివేము
రవికులతిలకా రామచంద్ర మా ప్రార్ధన మన్నించి ఓ
పవనసుతానుత దయతో మాకపవర్గము నీయవయా