9, సెప్టెంబర్ 2022, శుక్రవారం

కేసీఆర్ గారు ప్రధానమంత్రి ఐతే?


కేసీఆర్ గారు ప్రధానమంత్రి ఐతే? 
 
కాకూడదని రూలు ఏమన్నా ఉందా? 
 
ఊరకే‌ తమాషాకు ఈవిషయంలో కొంచెం ఆలోచన చేదాం.
 
ఆయన కూడా భారతదేశంలో ఒక ప్రఖ్యాత రాజకీయ నాయకుడు. ఆయన పార్టీకి విదేశాల్లో కూడా అదరణ ఉన్నది. కొన్ని దేశాల్లో పార్టీశాఖలు కూడా ఉన్నాయని తెలుస్తున్నది. ఆయన ఒక రాష్ట్రానికి రెండు సార్లు ముఖ్యమంత్రిగా ఎన్నికైన వ్యక్తి. అంతే కాదు మూడవసారి కూడా ఆయన ఆ తెలంగాణా రాష్ట్రానికి ముఖ్యమంత్రిగా ఎన్నికయ్యే అవకాశాలు పుష్కలంగా ఉన్నాయి. అది జరుగకూడదనే కేంద్రంలో ఉన్న అధికారపార్టీతో సహా అనేక పార్టీలు కాళ్లాచేతులా ఆయనను అడ్డుకోవాలని నానాతంటాలూ పడుతున్నాయి.

జాతీయపార్టీని స్థాపించి దేశోధ్ధరణచేసే ఉద్దేశాన్ని ఆయన ఎన్నడో బయటపెట్టారు. అది జరిగేది కాదులే అన్నట్లు మిగిలిన జాతీయ పార్టీలు కొంచెం తేలిగ్గా  తీసుకున్నట్లు అనిపిస్తోంది. కాని ఇటీవలి పరిణామాలను చూస్తే ఆయన జాతీయరాజకీయరంగంలో చక్రం తిప్పటానికే కాదు అధికారాన్ని హస్తగతం చేసుకుందుకూ ఉవ్విళ్ళూరుతున్నారని స్పష్టం అవుతోంది.

అందుచేత ముందుముందు ఆయన ప్రధాని అయ్యే అవకాశాలను ఏపార్టీ కాని తేలిగ్గా తీసుకోవటం కుదరదు.

ఇంతకూ ఆయన ప్రధాని అవ్వాలని కోరుకోవటం వెనుక కారణాలు ఏమిటీ అని ఆలోచిస్తే తోచే జవాబులు ఇవి:
  • భారతీయ జనతా పార్టీ తాను కేంద్రంలో అధికారంలో ఉండటమే‌ కాక ఇతరరాష్ట్రాలలో కూడా అధికారాన్ని హస్తగతం చేసుకుందుకు తీవ్రంగా ప్రయత్నిస్తోంది. అవసరం అనుకుంటే అడ్డదారుల్లో కూడా ఇతరపార్టీల ప్రభుత్వాలను కూల్చి మరీ అధికారాన్ని లాక్కుంటోంది. అది నైతికం కాదు.
  • ఏవో‌ రాష్ట్రాల్లో భారతీయ జనతా పార్టీ ఏమి తంటాలు పడితే నేమీ? అది తెలంగాణాలోకూడా అధికారంలోనికి రావాలని ఎత్తులు వేస్తోంది. అదెలా సహించటం? తెలంగాణాపై తమ తెలంగాణా రాష్ట్ర సమితి పార్టీకి తప్ప మరెవరికీ హక్కు లేదే? ఉండరాదే? ఉండనివ్వమే! ఎలా ఊరుకోవటం? దీనికి విరుగుడుగా భారతీయ జనతా పార్టీని జాతీయ స్థాయిలో దెబ్బకొట్టటమే మందు కదా.
  • దేశంలో కాంగ్రెసు పార్టీ‌ కూడా ఒకప్పటి పెద్దపార్టీ కాని నేడు అది దీనావస్థలో ఉంది. అది కోల్పోతున్న ఓట్లబ్యాంకులను భారతీయ జనతా పార్టీ కొల్లగొడుతోంది. ఆ పని తామే చేయవచ్చు కదా తమ జాతీయ పార్టీతో? భారతీయ జనతా పార్టీ వారిని ఇంకా బలపడ నీయటం ప్రమాదం కదా?
  • బంగారు తెలంగాణాని సాధించటం అనే‌కర్తవ్యం పూర్తి అయింది. దాన్ని పరిపాలించే బాధ్యతను తమ తెలంగాణా రాష్ట్రసమితి స్వీకరించి దిగ్విజయంగా నడిపిస్తోంది. ఆ పంథాలో కొనసాగటానికి తన వారసులు ఉంటే చాలు. తనకు జాతీయ రాజకీయాల్లో కూడా విజయపతాకం ఎగురవేసే అవకాశం ఉన్నప్పుడు చూస్తూ కూర్చోవటం ఎందుకు?
  • కేంద్రం తెలంగాణానూ ఆంధ్రానూ సమానంగానే చూస్తున్నాం అంటోంది. అదెలా ఒప్పుకోవటం. తెలంగాణానే‌ కదా ఎవరైనా పెద్దగా చూడవలసింది. 
  • కేంద్రం నుండి తాము అడుగుతున్నవి అరకొర గానే అందుతున్నాయి. అదే, కేంద్రంలోనూ తమదే అధికారం ఐతే తమకు కావలసిన వాటిని హాయిగా ఏ ఇబ్బందులూ లేకుండానే‌ పొందవచ్చును కదా. ఎన్నో‌ కొత్త ప్రాజెక్టులని ఏ‌ఆడ్దంకీ లేకుండా కట్టుకోవచ్చును. ఇతర రాష్ట్రాల - ముఖ్యంగా ఆంద్రా వారి - ప్రాజెక్టులను సులభంగా అడ్డుకోవచ్చును.
  • ఆంద్రతో వైరం ఉందంటే ఉంది. లేదంటే లేదు. అక్కడ తమ ఆశీర్వాదంతో ఏర్పడ్డ ప్రభుత్వం బ్రహ్మాండంగా పనిచేస్తోంది. కాని ఎంతైనా రాష్ట్రప్రయోజనాలు అంటూ తరచూ అడ్డుపడుతూనే ఉంది. ముందుముందు వచ్చే‌ ప్రభుత్వాలు అంధ్రాకు కాని మరింతగా సహాయపడవచ్చును. అప్పుడు తెలంగాణాలో తమ పట్ల నిరసనలు రావచ్చును కదా. అందుచేత ఆంద్రావారికి చెక్ పెట్టేందుకు సరైన దారి, కేంద్రంలో తామే అధికారాన్ని అందుకోవటం.
  • తమ వారికి ఎంత కాలం రాష్ట్రంలో చిన్నా చితకా పదవులు ఇస్తూ సంతోషపెట్టటం? కేంద్రంలో అధికారాన్ని పొందితే అప్పుడు తాను ప్రధాని, తన వాళ్ళను అనేక పెద్దపదవుల్లో పెట్టవచ్చును. ఉదాహరణకు కేటీఆర్ గారికి తెలంగాణాను అప్పచెప్పవచ్చు. హరీష్ రావును ఎక్కడికన్నా గవర్నర్ హోదాలో పంపవచ్చును. కవితను కేంద్రంలో హోం వంటి ముఖ్యశాఖకు మంత్రిని చేయవచ్చును. ఇంకా సంతోష్ వగైరాలున్నారు - వాళ్లకూ మంచిపదవులే ఇవ్వచ్చు, రాష్ట్రంలో ఉన్న అధికారంతో ఎంతమందికని మంచిస్థాయి కల్పించటం కుదురుతుంది?

ఇలాంటివే మరొక కొన్ని కారణాలు ఉండవచ్చును నాకు ఇంకా తట్టనివి.

ఏదైతేనేం కేసీఆర్ గారు కేంద్రంలో అధికారం కోసం ప్రయత్నం మొదలు పెట్టారు. శుభం.

ఒకవేళ కేసీఆర్ గారు కాని ప్రధాని ఐతే అప్పుడు జరిగే పరిణామాలు కొన్ని పైన సూచించన దాన్ని బట్టి తెలుస్తూనే ఉన్నా మరికొంతగా బేరీజు వేదాం.

  • ఎప్పటిలాగే దేశపరిపాలన ఐనా సరే హైదరాబాదులోని కేసీఆర్ గారి ప్రగతిభవన్ నుండే‌ జరుగుతుంది. ఒకవేళ ఆ భవనం చాలదూ అనుకుంటే మరొక కొత్త భవనం వెలుస్తుంది ఆయన ఫార్మ్‌హౌస్‌లో. అంతే కాని ఆయన ఢిల్లీలో కూర్చుని పనిచేయరు.
  • చిన్న చితకా పార్టీలన్నీ కేసీఆర్ గారు ఏర్పరచి అధికారంలోని తెచ్చిన పార్టీలో విలీనం అవుతాయి.
  • కాంగ్రెసు పార్టీ కూడా కేసీఆర్ గారు ఏర్పరచి అధికారంలోని తెచ్చిన పార్టీలో విలీనం కాక తప్పదు - కొంచెం మొరాయించినా.
  • భారతీయ జనతా పార్టీ అక్రమాల మీద విచారణ మొదలవుతుంది. 
  • వైకాపా వారు కేంద్రంలో అధికారం పంచుకుందుకు అంగీకరిస్తారు.
  • మజ్లిస్ పార్టీ వారు కేంద్రంలో అధికారంలొ ముఖ్య భాగస్వామ్యం వహిస్తారు.
  • కేసీఆర్ గారితో చేతులు కలిపి భారతీయ జనతా పార్టీని మట్టికరిపించిన ఇతర పార్టీలలో కొన్నింటికి సహాయ మంత్రుల వంటి చిన్నచితకా పదవులు దక్కుతాయి. కొన్నింటిని కేసేఆర్ గారు చెత్తబుట్టలో వేసేస్తారు.
  • మరిన్ని పరిశ్రమలు తెలంగాణాకు వస్తాయి. తెలంగాణా వారు వద్దన్నవి మాత్రమే యితరరాష్ట్రాలకు దక్కుతాయి.
  • భారతదేశ చరిత్రను కాంగ్రెసు వారు కంగాళీ‌ చేసారని ఆరోపించిన భారతీయ జనతా పార్టీ మొదలు పెట్టింది చరిత్రను పునర్లిఖించే ఉద్యమాన్ని. అది కొనసాగుతుంది. అతే మరో కోణంలో. అందులో కాంగ్రెసు చేర్చిన కహానీలూ భాజపా చేరుస్తున్న కహానీలూ అన్నీ ఎగిరిపోతాయి. కొత్త చరిత్రను - తెలంగాణా ఎలా భారతస్వాతంత్రాన్ని తెచ్చిందీ అన్న కోణంలో ముందు ముందు చదువుతాము.
  • సర్దార్ వల్లభాయి పటేల్ దుర్మార్గుడు అని ఋజువు చేసే కార్యక్రమం మొదలౌతుంది. ఆయన హైదరాబాదు మీద్ చేసిన దురాక్రమణను గురించిన కథనాలు జాతీయమీడియాలో ప్రముఖంగా చర్చిస్తారు.
  • నిజాం దొరల కీర్తిని చాటటం కోసం అనేక కార్యక్రమాలు మొదలౌతాయి. 
  • స్వాతంత్రోద్యమంలో కేసేఆర్ పూర్వీకులు చేసిన త్యాగాల కథలు వెలుగులోనికి వస్తాయి.
  • హరీష్ రావో‌ మరొక కేసీఆర్ దగ్గర బంధువో ఆంధ్రాకు గవర్నర్ అవుతారు.
  • పార్లమెంట్ సమావేశాలు అప్పుడప్పుడూ‌ కొద్ది రోజుల పాటు జరుగుతాయి. ఊరికే‌ ఎక్కువ రోజులు సాగతీసి ప్రజాధనం దుర్వినియోగం చేయరు.
  • ఒకటి రెండు దఫాలు కేసేఆర్ గారు ఎన్నిక చేసిన వ్యక్తులు రాష్ట్రపతులూ ఉపరాష్ట్రపతులూ అవుతారు. దరిమిలా అధికారం కేటీఆర్ గారికి ఒప్పచెప్పి కేసీఆర్ గారే రాష్ట్రపతి పదవిని అలంకరించి దానికి వన్నె తెస్తారు.
  • కేసేఆర్ భజన సంఘాల నాయకులు మేధావులుగా గుర్తింపు పొంది అనేక కీలక మైన పదవుల్లో జాతీయ స్థాయిలో చక్రం తిప్పుతారు.
  • మళ్ళా భారతదేశానికి అమెరికా లాగా  అధ్యక్ష తరహా ప్రజాస్వామ్యమే‌ మంచిది అన్న చర్చ మెల్లగా మొదలౌతుంది. 

ఇంకా చాలా జరుగవచ్చును.  వేచి చూడండి!

15 కామెంట్‌లు:

  1. కల చెదిరింది
    కథ మారింది
    కన్నీరే ఇక మిగిలింది
    కన్నీరే ఇక మిగిలేది

    రిప్లయితొలగించు
  2. తెలంగాణా కు కేంద్రం ప్రాజెక్టులు, నిధుల విషయం లో చాలా అన్యాయం చేస్తున్నది అన్న మాట వాస్తవం. అయితే కేసీఆర్ కేరళ తమిళనాడు రాష్ట్రాల ముఖ్యమంత్రులను గమనించాలి. విజయన్ , స్టాలిన్ బీజీపీ వ్యతిరేకుల యినా లౌక్యంగా ఉంటూ కేంద్రంతో తగవులు పెట్టుకోవడం లేదు. ఎన్నో ప్రాజెక్టులు తెచ్చుకుంటున్నారు.

    కారణాలు ఏవైనా ఆంధ్ర రాష్ట్రం కేంద్రం తో కొంత సఖ్యత గా ఉండటం వల్ల కొన్ని విషయాల్లో మంచి జరుగుతోంది.

    అయితే కేసీఆర్ దేశ ప్రధాని అయ్యే అవకాశం లేదు. తెరాసకు శాసన సభలో మెజారిటీ వచ్చినా లోక్ సభ సీట్లు మాత్రం 5-6 మించి రావు. 542 లో 5-6 సీట్ల పార్టీ నుంచి ప్రధాని సాధ్యం కాదు.

    రిప్లయితొలగించు
    రిప్లయిలు
    1. కేసీఆర్ గారు పెట్టే జాతీయ పార్టీకి ఎక్కువ సీట్లే రావచ్చును కదా. ఆయన ఏర్పరచే కూటమికే అధికారం రావచ్చునుగా. అంత తేలిగ్గా కొట్టిపారవేయ కూడదు.

      తొలగించు
  3. హైదరాబాదు ( దేశం ఓ కోన లో దిల్లీ రాజధాని యెందుకవ్వాలె ?) దేశం నడిబొడ్డు. దానినే రాజధాని‌గా మార్చాలె అని మార్పు కూడా చేయవచ్చు ప్రగతి భవన్ యేలిక వారి సంస్థానం గా వుంచుకోవడానికి ఎన్నికలలో గెలుపు తధ్యమయ్యాక గురువు గారు.

    రిప్లయితొలగించు
  4. రిప్లయిలు
    1. కేసీఆర్ జాతీయ పార్టీ /కూటమి విజయవంతం అయ్యి ప్రధాని అవుతే బాగుంటుంది. ఆయనకు ఆ సామర్థ్యం ఉంది.

      తొలగించు
    2. బాగుంటుందీ అంటారా? కొందరు కెసీఆర్ ఐతే అనీ కొందరు దీదీ అనీ కొందరు రాహులయ్య అనీ కొందరు మళ్ళా మోదీ అనీ అంటున్నారు. అంతమందీ కలబడితే ఎవరికి అధికస్య అధికం ఫలం అయ్యేనో మరి. చూదాం చూదాం.

      తొలగించు
  5. KCR ప్రధానమంత్రి అవడం ఇంచుమించు అసాధ్యం. మహా అయితే KTR కేంద్ర మంత్రి అవ్వచ్చు.
    నా ఊహ ప్రకారం వచ్చే ఎన్నికల తర్వాత మమతా బెనర్జీ ప్రధాని అవ్వచ్చు. కాని రెండేళ్లకే ప్రభుత్వం పడిపోయి మళ్ళీ ఎన్నికలు రావచ్చు.

    రిప్లయితొలగించు
    రిప్లయిలు
    1. కేసీఆర్ గారు ప్రధాని కావటానికి ఉన్న ముఖ్యమైన అడ్డంకి విపక్షాలన్నింటీకీ ఆయన అమోదయోగ్యుడైన నాయకుడిగా అవతరించటం దుస్సాధ్యం కావటమే అనుకుంటాను. అయన మాటలు ఆకర్షణీయంగా ఉండవచ్చును కాని నమ్మటం ఎలా? ఒకప్పుడు తెలంగాణా యిస్తే తనపార్టీని కాంగ్రెసులో విలీనం చేస్తాను అని చెప్పి ఆపైన పని జరిగాక మాటతప్పారు. అలాగే ఒక దళితుణ్ణి ముఖ్యమంత్రిని చేస్తాం తెలంగాణాకు అని ప్రకటించి అబ్బే అదేం వీలుకాదు నేనే ముఖ్యమంత్రిపదవిలో ఉండాలీ అని మాటతప్పారు. విపక్షనేతలు ఇవన్నీ దృష్టిలో ఉంచుకుంటారు. ఆయనతో ఎంతవరకూ మైత్రినెఱపాలో అంతకు మించి వ్యవహారం ముదరనిస్తారు అనుకోను. అయన నోటిదురుసు తెలంగాణాలో కొన్ని వర్గాలకు ముచ్చటగా ఉండవచ్చును కాని ఒక పెద్ద రాజ్యాంగపదవికి అయనను నిలపటానికి ప్రతిపక్షాలు తప్పకుండా విముఖంగా ఉంటాయి ఆకారణంగా కూడా. పైగా నేటి రాజకీయాల్లో విమర్శల స్థానంలో దూషణలు ప్రవేశించాయి - ఆకళలో కేసీఆర్ ఆరితేరారు. కాని ఆంద్రాలో వైకాపానాయకులంత కాదు లెండి. ఐనా సులభంగా దూషణలకు దిగే నాయకుడిని తమపెద్దగా ప్రతిపక్షసంఘటన ఎన్నుకోవటం ద్వారా కొరివితో తలగోక్కుంటుందని అనుకోవటం కష్టం.

      కేటీఆర్ గారు తెలంగాణాలో సకలశాఖామంత్రిగా చక్రంతిప్పుతున్నట్లు కనిపిస్తున్నా అన్ని చక్రాలనూ తిప్పేది కేసీఆర్ గారే అని అందరికీ తెలుసు. తండ్రిచాటు బిడ్ద ఐన కేటీఆర్ గారు కేంద్రమంత్రి కావటం జరిగితే జరుగవచ్చునేమో కాని అప్పుడాయన కేసీఆర్ గారి ప్రాక్సీగామాత్రమే పనిచేయగలరని అందరికీ తెలిసినదే కాబట్టి ఆయనకు కేంద్రమంత్రి పదవి ఇస్తాం కేసీఆర్ గారూ దూరంగా ఉండండి అనే పరిస్థితి ఉందదు. అందుచేత ఇద్దరూ బయటే ఉండవలసివచ్చే అవకాశమే‌ హెచ్చు.

      ప్రతిపక్షాల సంఘటన అంటూ‌ ఒకటి కాంగ్రెసు లేకుండా ఏర్పడుతుందా? కాంగ్రెసు వారు ఈ కేసీఆర్ గారిని పెద్దతలకాయగా పెట్టుకొని పనిచేస్తారా? ఏదో ఒక సంఘటనం ఏర్పడితే వారు కేసీఆర్ గారిని ఒక లౌడ్‌స్పీకర్ లాగా వాడుకుంటా రంతే!

      తొలగించు
  6. మీ ఈ పోస్ట్ కు సంబంధం లేని నా ఉ.బో.స. ప్రాంతీయతత్వ వాదుల్లో కొంతమంది కరడుగట్టినవారుంటారు. బ్లాగుల్లో కూడా ఇద్దరు ముగ్గురు తగులుతుంటారు. అటువంటి వారితో మీరు చర్చలోకి ఎందుకు దిగుతారు, మానుకోరాదూ?

    రిప్లయితొలగించు
    రిప్లయిలు
    1. మీరన్నది అక్షరాలా పచ్చినిజం. అటువంటి వారితో చర్చ మంచిది కానేకాదు. రెండుమూడు రకాల ఇబ్బందులు వస్తాయి. చర్చలు తెగవు. సులువుగా దారితప్పుతాయి. అనవసరమైన వైషమ్యాలు వస్తాయి. అందరి సమయమూ వృధా అవుతుంది. జాగ్రత వహించటానికి యత్నిస్తాను.

      తొలగించు
  7. తమ అభిమాన పార్టీ పైన, అభిమాన నాయకుల పైన ఎటువంటి విమర్శలు అంగీకరించలేని పరిస్థితి ప్రస్తుతం ఉంది . తమ నాయకుడిని విమర్శిస్తే ఒప్పుకోరు. కానీ ఇతర నాయకులను, పార్టీలను ధారాళంగా విమర్శిస్తారు. తమకు ఇష్టం లేని వ్యక్తులు మంచి పనులు చేసినా క్రెడిట్ ఇవ్వరు. తమ నాయకుడు ఎన్ని తప్పులు చేసినా నోరు మెదపరు. అనుకూల మీడియా లో తస్మదీయులను దూషించడం, వ్యక్తిత్వ హననం చేయడం, అస్మదీయులను ఆకాశానికి ఎత్తడం, అతి పవిత్రలు గా భజన చేయడం జరుగుతుంది.

    రిప్లయితొలగించు
    రిప్లయిలు
    1. పరిస్థితి అలాగే ఉందండీ. రాజకీయం ప్రజలకోసం అన్న స్థితి నుండి రాజకీయం అధికారం కోసం అన్న స్థితికి వచ్చింది పరిస్థితి. అందరూ ఇతరులు మాత్రమే దొంగలూ అని గోలచేస్తున్నారు. అందులో ఉఛ్ఛనీచాలూ లేవు మానవత్వమూ లేదు. దొమ్మీయే. సోషల్ మీడియా పుణ్యమా అని అదేస్థాయిలో రాజకీయుల అనుచరగణాలూ అదే స్థాయిలో కశ్మలం వెదజల్లుతున్నాయి.

      తొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.