శ్రీరఘురాముని చింతనమే

శ్రీరఘురాముని చింతనమే నను
చేరెడు గాక శ్రీకరమై

పామరత్వమున పడిపోనీయక
రాముని కృపయే రక్షించగను
కామక్రోధములు క్రమ్ముకొనక నను
రామనామమే రక్షించగను

కల్లగురువులకు కడుదూరముగ
నల్లనయ్య నను నడిపించగను
ప్రల్లదనము నను పైకొనకుండగ
చల్లగ రాముడు సంరక్షింపగ

దహరాకాశము నందలి రాముడు
బహుదయతో నను పాలింపగను
బహిరంతరముల ప్రబలిన యతడే
అహరహమును నాయాత్మ నేలగ