సులభమైన యుపాయమును చూడరే

సులభమైన యుపాయమును చూడరే మీరు భక్త
సులభుడైన రామవిభుని కొలువరే చేరి

అందరకును ధర్మమార్గ మందించగ వెన్నుడే
యందాల రాముడై యవనికి వచ్చి
యందరు మానవులవలె నాపదల నెన్నిటినో
పొంది గెలిచి చూపె మనకు పొలుపగు దారి

జయజయ  శ్రీరామచంద్ర జానకీమనోరమణ
జయజయ పట్టాభి రామ సాకేతరామ
జయజయ కళ్యాణ రామ శరణమనుచు వేడుచో
దయామయుడు రాముడిచ్చు తప్పక ముక్తి

రామచంద్రు డెవ్వానికి ప్రాణాధికుడై యుండు
రామనామ మెవ్వాని రసనకు హితము
రామతత్త్వ చింతనతో నేమానవుం డుండు
నా మానవుడు ముక్తుడగు నవలీలగను