26, ఏప్రిల్ 2012, గురువారం

నా చేయందుకో మని మనవి

మాయలు చాలించమని మనవి రామ నా   
చేయందుకో మని మనవి రామ

మెలకువతో మాయను గెలువగలుగు నంత
తెలివి నాకు లేదని మనవి నీ
వలన నిలచి యుంటినని మనవి నా
బలము నీవే నని మనవి

తఱుగని చదువులలో తగులువడి నిన్ను నే
నెఱుగుటయే కుదరదని మనవి  నీ
కరుణ యొకటె చాలని మనవి నా
బరువిక నీదే నని మనవి

తడవతడవకు కొత్త తగులముల జిక్కి నే
నిడుములను పడలేనని మనవి నే
బడలితి మన్నించమని మనవి యీ
పుడమి కిక రాలే నని మనవి