26, ఏప్రిల్ 2012, గురువారం

నా చేయందుకో మని మనవి

మాయలు చాలించమని మనవి రామ నా   
చేయందుకో మని మనవి రామ

మెలకువతో మాయను గెలుచెడు నంతటి
తెలివి నాకు లేదని మనవి నీ
వలన నిలచి యుంటినని మనవి నా
బలము నీవేనని మనవి

తరగని చదువులలో తగులుకొని నిన్ను
యెరుగుటయే కుదరదని మనవి  నీ
కరుణ యొకటె చాలని మనవి నా
బరువిక నీదేనని మనవి

తడవ తడవకు కొత్త తగులముల జిక్కి 
యిడుముపాటు పడలేనని మనవి నే
బడలితి మన్నించమని మనవి యీ
పుడమి కిక రాలేనని మనవి

6 వ్యాఖ్యలు:

  1. కవిత అంతా బాగుందండి. ఈ వాక్యాలు మరింత బాగున్నాయండి.

    తరగని చదువులలో తగులుకొని నిన్ను
    యెరుగుటయే కుదరదని మనవి నీ
    కరుణ యొకటె చాలని మనవి నా
    బరువిక నీదేనని మనవి.

    భగవంతుని శరణాగతిలో ఉన్నంత భద్రత భక్తునికి మరెక్కడా ఉండదు కదా !

    ప్రత్యుత్తరంతొలగించు
    ప్రత్యుత్తరాలు
    1. *భగవంతుని శరణాగతిలో ఉన్నంత భద్రత భక్తునికి మరెక్కడా ఉండదు కదా *

      భద్రత ఉండోచ్చు. అది భగవంతుని కలవక ముందు ఉంట్టుంది. కలసిన తరువాత భద్రత గురించి ఆలోచించరు.

      SriRam

      తొలగించు
  2. శరణాగతికి మించినది లేదండీ! గజేంద్రుడేమి చేఏశాడూ? శరణాగతి కదా!!!నీవేతప్ప....

    ప్రత్యుత్తరంతొలగించు
  3. సుందరమైన భావాలూ లలితమైన పదాలు
    ఎక్కడి వీ మధుర రాగాలు ..
    మీ చరణాలు వెంట నడిచినపుడల్లా
    నాలో ఇవే గానాలు , సరాగాలు
    ఎంతో అలరిస్తున్నాయి మీ గీతాలు

    ప్రత్యుత్తరంతొలగించు
  4. బాలకృష్ణారెడ్డిగారు, మీకు యీ గీతాలు నచ్చుతున్నందుకు చాలా సంతోషం.
    వీటిని వెలువరించటంలో నా ప్రతిభ యేమీ లేదు. అంతా ఆయన చిద్విలాసం.

    ప్రత్యుత్తరంతొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.