అన్నిటికిని నాకు నీవున్నా వను నమ్మకము

అన్నిటికిని నాకు నీవున్నా వను నమ్మకము

నన్ను సదా రక్షించుచున్నా వను నమ్మకము



ఈనాటిది కాదు కదా యేనాడీ భూమికి

నేను నేననుచు దిగినానో ఆనాటిది

నానాటికి బలపడినది నన్నెపుడు వీడనిది

నా నమ్మిక  యిది మంచిది నాకు రూఢియైనది



పదునాలుగు లోకములను పాలించు విభుడవే

యిదిగో యొక ప్రాణి నేలుటెంత మాట

మది నొక్కి ఘడియయేని మరువకుండు నన్నును

వదిలి యుందువా నీవు భక్తరక్షణాచణ



అనవరతము నీసేవ నమరుట నావంతు

నను దయతో నేలుట యనునది నీవంతు

వినుతశీల వంతులిట్లు విశదముగ నుండగ

నినునమ్మి భక్తుడనై నిలువనే నిచ్చలును