కనుగొంటిమి కనుగొంటిమి

జనకుని రాముని జనని సీతమ్మను
తనివార గద్దెపై కనుగొంటిమి

మన భాగ్య మింతింతన వచ్చునే లోక
జననీజనకుల నిటు కనుగొంటిమి
వినుతింతు రెవ్వాని విశ్వాత్మకుండని
మునులట్టి విభు నిదె కనుగొంటిమి

సకలలోకములకు సౌభాగ్య మొసగెడి
జననిని గద్దెపై కనుగొంటిమి
వినుతకృపాశీల విశ్వజననియని
మునులాడు తల్లిని కనుగొంటిమి

ఘనుడైన లోకావనశీలుడైన
యినకులవిభు నిదె కనుగొంటిమి
ఘనశీల లోకసంకటనాశిని యైన
జనకాత్మజ  నిదె కనుగొంటిమి