పొమ్మంటి వొక్క నాడు భూతలంబునకు

 
పొమ్మంటి వొక్క నాడు భూతలంబునకు తిరిగి
రమ్మనవు నేటి దనుక రామా యిది తగునా

నీవు మసలినట్టి భూమి కావున నే నియ్యకొని
నీ వానతి యిచ్చినట్లు నివసించగ దొడగితిని
నీవారల నరసికొనుచు నేలను గాలించుచును
భూవలయము తిరుగుచునే ప్రొద్దుపుచ్చు చుంటిని

ఇచట నేను చేయదగిన దేమియు నగుపడదే
ఇచట నన్ను తెలియు వార లెవ్వరు నగుపడరే
ఇచట నేను పొందదగిన దేమియు. నగుపడదే
ఇచట బహువేషంబుల నేల నేను తిరుగుట

నీపాటలు పాడుకొనుచు నేను ప్రొద్దుపుచ్చుదును
నీపవిత్రనామముతో నేను ప్రొద్దుపుచ్చుదును
తాపత్రయములను నన్ను తగిలించినది చాలును
శ్రీపతి యిక నీసన్నిధి చేర ననుమతించుము