మంచితనము

మంచితనము రాముడై మహిని వెలసెను హరి

వంచు నందరు సురలు నగ్గించ మెరసెను

వనజాసనప్రభృతు లడుగ వసుధను ప్రభవించెను

జనకున కచ్చెరువుగ శివధనువు నిట్టె విరచెను

జనులందరు మెచ్చగాను జానకిని గ్రహించెను

పినతల్లికి ప్రీతిగొలుప విపినములకు బోయెను

అంతులేని యసురుల దురంతములను బాపెను

చెంత చేరి నట్టి వారి చింతల నణగించెను

పంతగించిన దశముఖుని భండనమున గూల్చెను

సంతసించ జనులెల్లరు జగమును పాలించెను

తనపేరే యసురహృద్విదారకముగ చేసెను

తన భక్తుల కెల్లప్పుడు తానండగ నిలచెను

తన యశంబు నాచంద్రతారార్కము చేసెను

తన నామము జనులకు భవతారకముగ చేసెను