అమ్మా సీతమ్మ మ్రొక్కే మమ్మా

అమ్మా సీతమ్మ మ్రొక్కే మమ్మా కరుణించ

వమ్మా నీబిడ్డల మమ్మా మేము

సుగుణరాశి వసుమతీసుతవు నీవు

తగ జనకమహారాజు తనయ వీవు

జగదేకవీరుడు హరి సతివి నీవు

జగదేకమాత మహాసాధ్వి వీవు

చిరునగవుల జగములు శాసింతు వీవు

వరములిచ్చి రామభక్తవరుల కీవు

పరమశుభము చేకూర్తు వమ్మ నీవు

నిరుపమానదయాగుణాన్వితవు నీవు

సురవైరివంశ మెల్ల చిదిమితివి నీవు

శిరసువంచి మ్రొక్కేము సీతమ్మ నీకు

మరలమరల మ్రొక్కేము మాతల్లి నీకు

సిరివి నీవే సీతమ్మ శ్రీరామపత్ని

జానకిరామా ఓ జానకిరామా

జానకిరామా ఓ జానకిరామా బి

రాన నన్ను కావవయా జానకిరామా వి

జ్ఞానమయదివ్యరూప జానకిరామా ప్ర

జ్ఞానఘనానందరూప జానకిరామా

సకలరాక్షసాంతకుడవు జానకిరామా నీవు

సకలజగద్రక్షకుడవు జానకిరామా నీవు

సకలయోగిపూజితుడవు జానకిరామా నీవు

సకలభక్తవరదుడవో జానకిరామా

స్మరాంతకాభినందితుడవు జానకిరామా నీవు

సరోజభవవినుతుడవు జానకిరామా నిన్ను

స్మరించినంత కరుణింతువు జానకిరామా భవ

జ్వరమునణచు నీనామము జానకిరామా 

సదమలసత్కీర్తిపూర్ణ జానకిరామా  నీవు

సదయుడవని నేనెఱుగుదు జానకిరామా నేను

సదా నిన్ను స్మరించెదను జానకిరామా నీవు

సదా  నన్ను కరుణించుము జానకిరామా

ఏమయ్యా శ్రీరామ

ఏమయ్యా శ్రీరామ రామ యనవయ్య

ఆమాటే చాలుచాలని తెలియవయ్య

అమాటను పట్టుకొని హనుమ కూర్చున్నాడు

ఆమాటను పట్టుకొని హరుడు కూర్చున్నాడు

అమాటనె పట్టుకొని యఖిలయోగు లున్నారు

ఆమాటనె నీవు పలుకాడ వేమయ్య

శివుడిచ్చిన మంత్ర మది సేవించవేమయ్య

చవులుగొలుపు మంత్ర మది చదువ విదేమయ్య

భవతారక మంత్ర మని భావించ విదేమయ్య

పవలురేలు చక్కగను పలుకవేమయ్య

వెతలుదీర్చు మంత్ర మది విష్ణుమంత్ర మయ్య

బ్రతుకునిలుపు మంత్ర మది పరమమంత్ర మయ్య

అతిపవిత్రమంత్ర మిది అని తెలుసుకోవయ్య

చతురుడవై నీవును స్మరియించ వయ్య

తప్పు లెన్న వచ్చితే

తప్పు లెన్న వచ్చితే దశరదతనయా నీ

తప్పే లేదనుచు చెప్పతరము కాదయా

నన్ను పోరా భూమికని యన్నది నీవు

నిన్ను విడువ కుందునని యన్నది నీవు

తిన్నగా నిపుడు పలుకకున్నది నీవు

యన్నన్నా నాతప్పు లెన్నవచ్చునా

నిన్ను నమ్ముకొనిన చాలునన్నది నీవు

నన్ను నీదు యంశనని యన్నది నీవు

ఎన్నడును కానరాక యున్నది నీవు

తిన్నగా నాతప్పు లెన్నవచ్చునా

నన్ను గావ రాముడవై యున్నది నీవు

ఖిన్నుడైన జీవుడనై యున్నది నేను

నన్ను బ్రోవ మనసురాక యున్నది నీవు

మన్నించుము నాతప్పు లెన్నవచ్చునా

రానీ రానీ

రానీ రానీ
రాముని నామము నోట
- నీనోట
పోనీ పోనీ
పోగైన పాపపు మూట
- నీమూట

మిక్కిలి సొగసైన మాట అది
మిక్కిలి విలువైన మాట
మిక్కిలి సులువైన మాట అది
మిక్కిలి సుఖమిచ్చు మాట
మిక్కిలి కుదురిచ్చు మాట అది
మిక్కిలి ఫలమిచ్చు మాట
మిక్కిలి తీయన్ని మాట అది
మిక్కిలి శుభమిచ్చు మాట

నూటికి కోటికి యొకనికి అది
నోటికి దొరకెడు మాట
నోటికి చిక్కిన పిమ్మట పొర
పాటున విడువని మాట
పాటలు కట్టుచు పాడుచు అది
వదలక నుడివే మాట
ఆటల పాటల మధ్యన అల
వాటుగ నుడివే మాట

ధారుణి సుజనులు నోటను అది
తీరుగ నిలచే మాట
తీరైన చక్కన్ని మాట అది
ఆరాట మణచే మాట
ఆరాట మణచి వేగమే ఒక
దారిని చూపెడు మాట
దారికి వచ్చిన వారికి సం
సారము తొలగే మాట

తెలియని తీరం

తెలియని తీరం చేరగ బోయే
దిక్కుమాలిన పడవకి
తెలిసీతెలియని నావికుడి అతి
తెలివితేటలే దిక్కట

తోడుపడెదమని ఓడ నెక్కిరి
తోడుదొంగలై ఆరుగురు
వేడుకతో వారు ఓడకళాసును
వెఱ్ఱివానిగా చేసిరి
పాడుదారులను పోవుచు నున్నది
ఓడ వారికే లోబడి
ఓడ తీరమును చేరుటెన్నటికి
నుండని దాయె పరిస్థితి

ఎంతో కాలము భవసంద్రాన
యిటు నటు సాగిన దాపడవ
చింత మెండాయె జీవి కళాసున
కెంతకు తీరము కనబడక
ఎంతకాలమని యిటునటు పోయే
దంతు లేని యీ సంద్రమున
ఇంతకు నీయారుగురికి దారేదీ
సుంతైన తెలియమి యెఱుకాయె


అందాలనౌక అతిపెద్దనౌక
అటువైపుగా నొకటి వచ్చెనదే
ఎందుకు వచ్చిన పడవప్రయాణ
మిందుచేరమని చేజాచి
సుందరాకారుడు శ్రీరాము డనువాడు
తొందరించుచు పిలువగనే
అందరు దొంగలు సంద్రాన దూకిరి
ఆపడవ వాడెక్కె నానౌక

ఎన్ని పూజలు

ఎన్ని పూజలు నీవు తిన్నగా చేసినా దేవు

డెన్నుకొనిన్నాళ్ళె యిల మీద యునికి

పాతపద్దులు తీసి కొత్తలెక్కలు వేసి

మేతయింతని వ్రాసి మేదినికి పంపు

అతురతొ నీవెన్ని యర్జీలు పెట్టినా

ఆత డవి గైకొనడురా తెలుసుకో

పద్దులను చేర్ఛేవు ప్రతిదినంబును నీవు

వద్దన్న నవి వాడు వ్రాసి లెక్కించు

ముద్దుగా నినుపిలిచి పుస్తకంబును తీసి

దిద్దుకొమ్మని పంపు దినమను వచ్చు

పద్దులగోలయే వద్దని నీవంటె

ముద్దుగా శ్రీరామమూర్తినామము ము

ప్పొద్దులా పలుకరా బుధ్ధిగా నికమీద

పద్దులపుస్తకము వాడు చింపేను

ఈపద్దులగోల ఆపైనలేదురా

భూపతనములు లేక పోయేనురా

నీపాటికి నీవు నివసించవచ్చు

శ్రీపతిపదసీమ చేరి హాయిగను

నీదయచాలున్ 9

కం. దశరథనందన రామా

దశకంఠఖరాదిదుష్టదైత్యవిదారా

కుశలత నిన్ను భజింపగ

నిశలు నహంబులును నాకు నీదయచాలున్

నీదయచాలున్ 8

కం.మానవనాథోత్తమ ప్ర
జ్ఞానఘనానందరూప జానకిరామా
దీనావన సత్యంబుగ
నీనామమె చాలు నాకు నీదయచాలున్

నీదయచాలున్ 7

కం. ఘనమగు వరముల నీయను

మునుకొని కష్ఠముల దీర్ప మోక్షము నీయన్

జననాథోత్తమ రామా

నినుమించిన దైవ మెవరు నీదయచాలున్

నీదయచాలున్ 6

కం. సవినయముగ వర్తింపను

అవసరమను పేర కల్లలాడక యుండన్

దివిజులు మెచ్చగ భువిపై

నివసించగ రామచంద్ర నీదయచాలున్

నీదయచాలున్ 5

కం. తలచుటకై నిను నిత్యము

కొలుచుటకై చేతులార కొండాడుటకై

పలుకులతో తనివారగ

నిలకడగా రామచంద్ర నీదయచాలున్

నీదయచాలున్ 4

కం. ధర నివి యవి భోగింపగ

వరములు నాకేల రామ వలదు మహాత్మా

మరి యేమి వలయు ననగా 

నిరుపమకరుణాలవాల నీదయచాలున్

నీదయచాలున్ 3

సిరులా నమ్మగ రానివి

తరుణుల ప్రేముడులు నమ్మ దగనివి తనువుల్

సరిసరి బుడగలె రామా

నిరంతరం బగుచు వచ్చు నీదయచాలున్

నాతికి నీదయ

కం. నాతికి నీదయ దక్కెను

కోతులరాయనికి దక్కె గొప్పగ నాసం

పాతికి దక్కెను ముందే

యాతని తమ్మునకు దక్కె నది శ్రీరామా

నీదయచాలున్ 2

కం. నీవాడెవ్వడు రామా

పైవాడెవడయ్య నీకు వైకుంఠపతీ

భావింపగ నందరమును

నీవారమె తండ్రి మాకు నీదయచాలున్

నీదయచాలున్

కం. జగదేకసార్వభౌమా

అగణితసుగుణాభిరామ అసురవిరామా

గగనశ్యామా రామా

నిగమవినుత పూర్ణకామ నీదయచాలున్

నను బ్రోచు దొరవు

కం. నను బ్రోచు దొరవు నీవని

మనసారా నమ్మినాను మంగళనామా

మునిజనహృదయారామా

జననుతసుగుణాభిరామ జానకిరామా

నిను నమ్ముకొంటి

కం. నిను నమ్ముకొంటి రామా

సనకాదిమునీంద్రవినుతసద్గుణధామా

వనమాలికాభిరామా

వనజాసనవినుతలోకపావననామా

శ్రీరామచంద్ర నాపై

కం. శ్రీరామచంద్ర నాపై
కారుణ్యము చూప వెంత కఠినుడవో సం
సారము నొల్లక మది ని
న్నారాధించున దుసూరుమనుటకు కాదే

ఆపద్భాంధవ నీవే

కం. ఆపద్భాంధవ నీవే

కాపాడగ రాని యెడల కాపాడుటకై

నాపాలి దైవమెవ్వడు

తాపత్రయశమన రామ దశరథతనయా

రామచంద్ర మాశ్రయే

రామచంద్ర మాశ్రయే

ప్రేమస్వరూపం

సౌమిత్రీసేవితం

సామీరీపూజితం

కామాదివర్జితం

కామారిసన్నుతం

సకలసుగుణాన్వితం

సకలమునిపూజితం

వికటదనుజాంతకం

వికచకమలనేత్రం

అతిమధురభాషణం

పతితజనపావనం

సతతశుభకారణం

ఆతులితైశ్వర్యదం

రవివంశభూషణం

దివౌకసతోషణం

భువనైకపోషణం

భవదుఃఖశోషణం

రామనామము చేయరా

రామనామము చేయరా

రామనామము చేయరా

రామనామము చేసి పొంద

రాని దేమీ లేదురా

రామనామమె వీలురా

రామనామమె మేలురా

రామనామమె చాలురా

రామనామము చేయరా

రామనామమె సులభము

రామనామమె సుఖదము

రామనామమె ఫలదము

రామనామము చేయరా

రామనామమె సురనుతం

రామనామమె శివనుతం

రామనామమె జననుతం

రామనామము చేయరా

రామనామమె శ్రీకరం

రామనామమె శుభకరం

రామనామమె భవహరం

రామనామము చేయరా

రామనామమె కామదం

రామనామమె జ్ఞానదం

రామనామమె మోక్షదం

రామనామము చేయరా

నేనే

ఆకునై గాలియలకు ఆడేది నేనే

ఆకును కదలించు గాలియలను నేనే

కలకల స్వనములతో కదలాడు ఆకుల

తులలేని పూరెమ్మ  కులుకులును నేనే

యలలయలల గాలికి తలయూచు ఆకుల

తిలకించు కనుగవయు తెలియగ నేనే

గాలియలల మధ్యన గడుసుగా తోచే

మేలిసుగంధాల పూబాలయును నేనే

గాలియలలలో సుగంధాల జాడ నేనే

రోలంబమై పువుల వ్రాలునది నేనే

మునివృత్తి పొదవెనుక మునిగినది నేనే

మునినిదాచు మంచిపూపొదయును నేనే

మునితలపై వ్రాలిన పుష్పమును నేనే

మునిచిత్తమున రామమూర్తియును నేనే

అతిశుభదమంత్రము

అతిశుభదమంత్రము అతిసుఖదమంత్రము

అతిసులభమంత్రము హరిమంత్రము

సతతమును చవులూరు చక్కనిమంత్రము

బ్రతుకులను పండించు పరమంత్రము

అతిశయంబుగను బుధు లగ్గించుమంత్రము

మతిమంతు లెన్నడును మానని మంత్రమ

సుర లెప్పుడును పొగబడు సుందరమంత్రము

పరమాత్ముడైన హరి వరమంత్రము

సిరిసంపదలను వర్షించెడు మంత్రము

ధర నందరకును భవతారకమంత్రము

రామదాసులకు హృదయరంజకమంత్రము

కామదాసులకు లొంగని మంత్రము

కామారి ధ్యానించు ఘనమగు మంత్రము

రామనామ మనగ విరాజిలుమంత్రము

ప్రేమగ రెండక్షరములు

ప్రేమగ రెండక్షరములు 

    రామ యని పలుకరా

ఆమాటయె చాలునురా 

    అమితఫలము కలుగునురా

ఆమాటయె సత్యమని

    అఖిలజగము నెఱుగునురా

ఆమాటయె నిత్యమని

    ఆత్మశుధ్దిగ నమ్మరా

ఆమాటయె నిన్నుకాచు

    నాయుధముగ నుండునురా

ఆమాటయె నీకు ముక్తి

    నందించెడు మంత్రమురా

ఆమాటయె ప్రాణముగా 

    అమ్మ సీత యున్నదిరా

ఆమాటయె మంత్రముగా 

    హనుమ నిలచి యున్నాడుర

ఆమాటను నమ్ముకొని 

    యందరు మునులున్నారుర

ఆమాటకు తిరుగులేదు 

   అదియె ప్రేమగ పలుకరా

ప్రేమగ నాసదాశివుడు 

    విడువక స్మరియించునురా

ప్రేమగ సజ్జనులు సతము 

    పిలచి మురియుచుందురురా

ప్రేమగ సద్భక్తులెల్ల 

    పిలచి ముక్తులగుదురురా

ప్రేమతో పిలుచువారికి 

    రాముడెపుడు పలుకునురా

ఆరూఢిగ భవతారకమై

కం. ఆరూఢిగ భవతారక
మై రాముని నామ మొకటె మహిని వెలుంగన్
తీరుగ యోగులు భక్తులు
చేరుదు రద్దాని వలన శ్రీపతి పదమున్

మేలగు హరినామంబులు

కం. మేలగు హరినామంబులు

వేలాదిగ నున్న గాని పేరెన్నికయై

తేలినది రామనామము

బాలవిధూత్తంసుదివ్యభావంబునకున్

ఏమంత్రము నెఱుగను

కం. ఏమంత్రము నెఱుగను నీ

నామమునే కాని నేను నళినదళాక్షా

రామా భవభయవారక

నామా యితరంబులేల నాకు మహాత్మా

పైవారము కామయ్యా

కం. పైవారము కామయ్యా

నీవారము కాని మేము నీరజనయనా

భావించక మాతప్పులు

నీవే కాపాడవలయు నిజముగ రామా

పాపగ్రహములు

కం. పాపగ్రహములు నింగిని

కోపంబుగ మమ్ము చూడకూడదు కదరా

శ్రీపతి భక్తులమని యవి

యాపగిదిని నడువ వేమిటయ్యా రామా

రేపో మాపో

కం. రేపో మాపో వత్తువు

కాపాడెద వనెడు నమ్మక మ్మున్నదిరా

నాపాలి దైవరాయా

భూపాలా రామచంద్ర మ్రొక్కెద రారా

రానీ రానీ

కం. రానీ రానీ తనువులు

పోనీ పోనీ యుగములు పోగా పోగా

రానే రాదా నీదయ

యేనాటికి నైన రామ యినకులతిలకా