మురళీరవము విని పరుగున వచ్చితిమి
పరుగులు తీయకురా బాలగోపాలా
మురళినూది పిలచినది మరల పారిపోవుటకా
విరిపొదల దూరి నిన్ను వెదుకలేమురా
సరసమైనమురళిపాట చాలని రాగా యిటు
పరుగులు తీసేవు నీవు మరియాదటరా
పరుగుపరుగన వనితలు వచ్చిరని చులకనయా
పరుగులుతీయించి యాడవచ్చు నను భావనయా
మురళిపిలుపు వేరొకరికి పంపిన సంకేతమా
మురళీధర నీకిపుడు పరుగులేలరా
పాటపాడు వరకు నిన్ను పారిపోనీయమురా
నీటుకాడ మురళితీసి పాటపాడరా
గోటితో కొండ నెత్తిన గోవిందుడా మురళి
పాట లింక వినిపించర పారిపోకురా