నీవే చెప్పుము శ్రీరామా

నీవే చెప్పుము శ్రీరామా యిది నిజమోకాదో రఘురామా

తీరుగ నీవుండగ మిత్రుడవై వేరే స్నేహితు లెందుకయా

ఆరుగు రుండగ శత్రువు లగుచును వేరే శత్రువు లెందుకయా

పెద్దచుట్టమై నీవుండగ మరి వేరే చుట్టము లెందుకయా

ముద్దపెట్టు నీవుండగ నితరుల పోషణకోరే దేమిటయా

గురుడవు నీవై నాకుండగను గురువును వెదకే దెందుకయా

అరయ నాకన్నియు నీవిడగా పరులను వేడే దెందుకయా 

తారకనామము పరమమంత్రమన తక్కిన మంత్రము లెందుకయా

తీరముజేర్చే భారము నీదన దిగులుపడుట నాకెందుకయా

నీవే యోగక్షేమము లరయగ నేను భయంపడు టెందుకయా

దేవుడ వని ని న్నెఱిగి యితరులను భావించుట నాకెందుకయా