హరహర శివశివ హరహర యనుచు హరుని చేరితే హరుడేమో
పరమ సుఖంబుగ పద్మాసనమున హరిని తలచుచు నున్నాడు
తారకనామము నానందముగా ధ్యానము చేయుచు నున్నాడు
శ్రీరఘురాముని నామస్మరణము చేయుచు సుఖముగ నున్నాడు
మారజనకుని మదిలో తలచుచు మారవైరి హరి డున్నాడు
గౌరీనాథుడు శ్రీహరిధ్యానము ఘనముగ చేయుచు నున్నాడు
హరిహరి మాధవ హరిహరి యనుచు హరిని చేరితే హరియేమో
పరమేశ్వరుని హరుని తలంచుచు పరమసుఖముగా నున్నాడు
ధ్యానము చేయుచు శివపంచాక్షరి తన్మయుడై హరి యున్నాడు
అ నారాయణు డానందముగా హరుని స్మరించుచు నున్నాడు
ఆ నటరాజును మదిలో మలచుచు అతి భక్తుడు హరి యున్నాడు
శ్రీనాధుడు హరి శివధ్యానమును ప్రీతిగ చేయుచు నున్నాడు
హరుని చేరితే హరుడేమో హరిధ్యానములో నగుపడును
హరిని చేరితే హరియేమో హరధ్యానములో నగుపడును
హరిహరు లిరువురు వేరువేరని యనుకొంటే యిది వింత
హరిహరు లిరువురు నొకటే నన్నది యెఱుగ కలుగు పులకింత
కామెంట్‌లు లేవు:
కామెంట్‌ను పోస్ట్ చేయండి
ఆమోదించిన వ్యాఖ్యలే ప్రచురితం అవుతాయి. తరచుగా పరిశీలించటం వీలు కాదు కాబట్టి అప్పుడప్పుడు వ్యాఖ్యలు కనిపించటం ఆలస్యం కావచ్చును. తరచుగా జవాబులు ఇవ్వటం నాకు వీలు కాదు. ఎక్కువగా చర్చించటం అస్సలు వీలుకాదు.