నిన్నే నమ్మితి గాదా శ్రీరామచంద్ర నీవాడనైతి గాదా
నన్నే నమ్మి కొలిచి నీనామమే తలచి నీవాడ నైతి గాదా
ధారాళమైన కృపకు క్షీరసముద్రము శ్రీరాముడే యనుచును
లేరు వేరొకరు చూడ శ్రీరాముని వంటి కారుణ్యమూర్తి యనుచును
ఊరూర నీదు భక్త వీరులు పొగడుచుండ నుత్సాహించి వినుచును
వారల వలన నిన్ను గూరిచి తెలిసికొనుచు భక్తిపరుడ నగుచును
కూరిమి పంచినట్టి కోతిరాజుకు భీతి తీరిచి నట్టి వీరుడా
తీరుగ నమ్మికొలుచు కోతికి బ్రహ్మపదవి దీవించినట్టి దేవుడా
ఔరౌర ఉడుతకైన కూరిమి పంచువాడ ఓహో శ్రీరామచంద్రుడా
నోరార నీదుకీర్తి నుడువుచుండెడి నాపై కూరిమి చూపరాదా
చేరి నిన్నేకొలుచు సద్భక్తుడను కాదా చింతలు తీర్చరాదా
నీరజనయన భవసాగరమున నుండి నేడే రక్షింపరాదా
ఆరయ నాదు భక్తు లెన్నడు చెడరనుచు నాడిన దీవు కాదా
ఔరా నీవే రామో ద్విర్నాభిభాషతే యన్నది నిజము కాదా
కామెంట్‌లు లేవు:
కామెంట్‌ను పోస్ట్ చేయండి
ఆమోదించిన వ్యాఖ్యలే ప్రచురితం అవుతాయి. తరచుగా పరిశీలించటం వీలు కాదు కాబట్టి అప్పుడప్పుడు వ్యాఖ్యలు కనిపించటం ఆలస్యం కావచ్చును. తరచుగా జవాబులు ఇవ్వటం నాకు వీలు కాదు. ఎక్కువగా చర్చించటం అస్సలు వీలుకాదు.