5, మార్చి 2022, శనివారం

సకలజగము లేలు వాడు జానకీవల్లభుడు

సకలజగము లేలు వాడు జానకీవల్లభుడు
సకలజనులు వెస వాని శరణువేడుడీ
 
ఈరాము డెవ్వడనుచు నెవ్వ రైన నడుగుదురా
ఈరాముని యుగములుగ నెఱుగును జగము
ఏరాముడు జగధ్ధితము కోరి ధరకు వచ్చినాడొ
ఆరాముని యెఱుగమనక కోరుడీ‌ శరణము
 
చేరి కొలుచు సురల దృష్టికి నారాయణ దేవుడు
ఆరయ యోగుల దృష్టికి నతడు బ్రహ్మము
శ్రీరాముని మించు వాడు సృష్టి నెట్లుండును
శ్రీరాముని యెఱుగమనక కోరుడీ‌ శరణము
 
శరణము కోరు వారి సకల భయలులు తొలగు
శరణము కోరు వారి జన్మ ధన్యము
శరణము కోరి రామచంద్రుని సేవించితే
నరులారా తరించెదరు శరణము కోరుడీ