ఘోరసంసారమహాకూపమగ్నుల మయ్య
శ్రీరఘురామ మము చేదుకోవయ్య
ఇచట నజ్ఞానతిమిర మెపుడు తొలగకున్నది
ఇచట కామాదిసర్పగణము కఱచుచున్నది
ఇచటనుండి వెడలుదారి యెఱుగరాకున్నది
ఇచట నీదు కృప గాక యేమి దిక్కున్నది
మమ్మిందు పడవేసిన మహితశక్తి యేదో
మమ్మేటికి ద్రోచెనదో మరియీ బావిలో
వమ్ముపఱచె మాబ్రతుకులు భగవంతుడా మే
మెమ్మెయి నీదయలేక యిది వెడలుదుము
భక్తులము సంసారవిరక్తులము కాని మేమ
శక్తులము బయటపడగ చక్కగ నిను జేరగ
యుక్తి వేరొండు లేదు యుచితమనుచు నీవే
ముక్తులముగ జేయవయ్య మోమాట మేల
