పాడండీ హరిని గూర్చి ఆడండీ హరికొరకే
వేడండీ హరి నొకనే వేడుకతో మీరు
పాడదగిన వా డింకొక భగవంతు డనగ లేడు
వేడదగిన వా డింకొక విభుడెవ్వండును లేడు
ఆడించే ఆటగాడు హరికన్యుం డన లేడు
వేడుకగా హరియే మీవాడై యున్నాడు
వాడు మిమ్ము సత్కృపతో పాలించుచు నున్నాడు
వాడు మీకు సమస్తమును ప్రసాదించు చున్నాడు
వాడు మీకు సమీపమున వర్తించుచు నున్నాడు
వాడు మీకు మోక్షమిచ్చు వాడై యున్నాడు
హరేరామ యనుచును మీ రాడండీ పాడండీ
హరేకృష్ణ యని వేడ్కగ నాడండీ పాడండీ
మరొక్కరిని తలపోయగ మనకేల చెప్పండీ
హరికై మీరాడి పాడి యానందము పొందండీ
