21, ఏప్రిల్ 2012, శనివారం

నిజమే నేమో లే నేమో యే ఋజువులు సాక్ష్యము లేలా

నిజమే నేమో లే నేమో యే
  ఋజువులు సాక్ష్యము లేలా నా
నిజరూపము నీ దివ్యవిభూతీ
  విజయవిలాసవిశేషమేమో

నానారూపము లందున నీవు
  నానాలోకము లందున నుందువు
మానవరూపము మరియటులే గద
  పూని ధరించితివో యీ దేహము

లేని నాకు యిటు లేల నుంటినని
  లేని పోని తలపేలా గలిగెను
కాని తలపుల కాలము చనగా
  కానగ నైతినిగా నిజతత్వము

పోనీలే యిపుడైనా విషయము
  జ్ఞానదృష్టికి సంధించితివి
మానక నీ యందే నిలచెద
  నేనని వేరుగ లేనే లేనుగ