9, మే 2022, సోమవారం

రామనామము చేయరా శ్రీరామనామము చేయరా

రామనామము చేయరా శ్రీరామనామము చేయరా నీ
వేమి చేసిన మానినా శ్రీరామనామము చేయరా

పాపతూలవాతూల మనగా వరలుచుండును రామనామము
కోపతాపము లణచి శాంతిని కూర్చుచుండును రామనామము
శాపగ్రస్తము లైన బ్రతుకుల చక్కబరచును రామనామము
లోపమెన్నక భక్తులను దయజూచుచుండును రామనామము

రామనామము నోటనుండిన రాదు లోటనుమాట బ్రతుకున
రామనామము సాటిసంపద భూమిపై నింకొకటి లేదు
రామనామము చిత్తశాంతిని ప్రేమతో నీకొసగుచుండును
రామనామము చేయువానిని రాముడే రక్షించుచుండును

పవనతనయుడు పులకరించుచు పాడుచుండును రామనామము
శివుడు నిత్యము ప్రేమమీఱగ చేయుచుండును రామనామము
అవనిజనుల తరింపజేయగ నవతరించెను రామనామము
పవలురేలును నీవు మానక పాడరా శ్రీరామనామము




1 కామెంట్‌:

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.