ఏమో అదియేమో నే నేమెఱుగుదు

	ఏమో అది ఏమో నే నే మెఱుగుదు రామా నీ మహిమ నే నే మెఱుగుదు
	భూమిజ తానెఱుగును శ్రీమహాలక్ష్మి తాను సౌమిత్రియు నెఱుగు శేషాహియే తాను తా మెఱుగుదు రయ్య తపసిసత్తము లైన వామదేవ వశిష్ట విశ్వామిత్రులు	ఏమో
	వాయుసుతు డెఱుంగును పరమశివుడు తాను ఆ యెలుగుల రా జెఱుంగు నజుని యంశ  తాను మాయామానుష విగ్రహ మరి యితరులకు నీ యధ్భుతతత్త్వము దుర్జ్ఞేయ మయ్య	ఏమో
	పరగ రామదాస త్యాగబ్రహ్మాదులకు కరుణతో మోక్షమొసగి కాచిన దేవ నిరుపమానందరూప నీ వాడనుగా సరగున నొనరించి ప్రోవ జాగేల నయ్య	ఏమో