శ్రీరాము డున్నాడు చింత యేల

     

రామకృపాస్తోత్రం

సీ. పరమకృపాళువై పాపంబులను బాప
        శ్రీరాము డున్నాడు చింత యేల

దయను సముద్రుడై తాపంబులను దీర్చ
        శ్రీరాము డున్నాడు చింత యేల

కరుణాంతరంగుడై కష్టంబులను దీర్చ
        శ్రీరాము డున్నాడు చింత యేల

కనికరించి తలను కాచి రక్షించగా
        శ్రీరాము డున్నాడు చింత యేల


తే. కలిమి శ్రీరామకృప చేత కలుగుచుండు
లేమి శ్రీరామకృప చేత లేకయుండు
జయము శ్రీరామకృప చేత జరుగు చుండు
బ్రతుకు శ్రీరామకృప చేత పండుచుండు


ఆ.వె. శరణు శరణు రామ పరమకృపాధామ
శరణు శరణు రామ సార్వభౌమ
శరణు శరణు రామ పరమపావననామ
శరణు శరణు ధరణిజా సమేత


కం. ఈ‌ రామకృపాస్తోత్రము
తీరుగ జపియించ రామదేవుని కృపచే
ధారాళమగును సౌఖ్యము
శ్రీరాముని యందు భక్తి చేకూరు హృదిన్