మీనంబవై యబ్ధిలోన

సీ. మీనంబవై యబ్ధిలోన డాగిన సోమ
      కుని పరిమార్చిన ఘనుడ వీవె
కమఠంబవై పాలకడలిలో మంధర
      మును దాల్చి నిలిపిన ఘనుడ వీవె
యజ్ఞవరాహదివ్యాకృతి నిల బ్రోచి
      కనకాక్షు జంపిన ఘనుడ వీవె
నరమృగాకృతి హిరణ్యకశిపు జీల్చి లో
      కంబుల బ్రోచిన ఘనుడ వీవె
తే.గీ.  బలిని యాచించి యణచిన వటువు వీవె
రాచకులమును బలిగొన్న రాముడవును
ఆది నారాయణుండవు నరయ నీవె
రావణాంతక నా తండ్రి రామచంద్ర

(వ్రాసిన తేదీ: 2013-4-27)