తోడై యుండెడి వాడు లేడు వేరొకడు

తోడై యుండెడి వాడు లేడు వేరొకడు నే
నేడ బోవుదును మారాడ వేమి రామ

గడచిన జన్మంబుల నడచినట్టి కథలకు
పడిన కష్టంబులకు పరగ సాక్షివి నీవె
ఒడిదుడికుల కావలి యుత్తమం బగు స్థితికి
నడిపించు వారింక నా కెవ్వరున్నారు

ఉన్నది నీ వొక్కడవె యన్న సంగతి నమ్మి
యున్నందు కే ఫలము తిన్నగ నిచ్చితివి
నన్ను తిప్పలు బెట్టుచున్న ప్రకృతిమాయ
నన్నన్న తొలగించకున్నావు న్యాయమా

మనకు బేధము లేని మాట సత్యమె గాని
వినుము దేహభ్రాంతి నను వీడకున్నదే
తనువుల దూరి యిటు దారితప్పిన దాని 
గొనుము నీ ప్రతిబింబమును నీవు గొబ్బున