హరా యనక హరీ యనక మరే మందువో
మరే మనిన మోక్ష మబ్బు మాట సున్నరా
హరహర శివ శంభో యని యార్తితో పిలిచితే
పరమశివుం డగుచు నీకు పలుకునురా దైవము
హరదీక్షాపరుడ వగును నరజన్మము నడిపితే
మరల గర్భనరక మన్న మాట లేదు సత్యము
రామ రామ రామ యని ప్రేమతో పిలిచితే
రామచంద్రు డగుచు నిన్ను రక్షించును దైవము
రామభక్తివిశేషమే ప్రాణముగా బ్రతికితే
భూమి నింక నీ వెన్నడు పుట్ఝబోవు సత్యము
ఎవరెవరినొ యెంచి నీవు యింపుగా పిలిచితే
భువిని నిన్ను కటాక్షించబోదు కదా దైవము
వివర మెరిగి హరిహరులను వేడుకొన్న వారికే
భవబంధవిమోచన మను పలుకు మిగుల సత్యము
కరుణించవలయు నను కాదులే దనక
పరమభక్తుడనను భావంబు తోడ
నరసింహుడవు నీవు నారాయణుడ వీవు
పరమాత్ముడవు నీవు పట్టాభిరామా
కరుణాళుడవు నీవు వరదాయకుడ వీవు
సురసేవ్యుడవు నీవు సొంపుమీరగను
కరివరదుడవు నీవు కాలరూపుడ వీవు
పురుషొత్తముడ వీవు భువనైకనాథా
ధరణిజాపతి వీవు సరసహృదయుడ వీవు
సురవైరికాలుడవు సొంపుమీరగను
రవికులేశుడ వీవు రఘునాథుడవు నీవు
కువలయేశుడ వీవు గోవిందరామా
భవతారకుడ వీవు బాగుగా నామొఱల
నవధరించుచు మిగుల నానందముగను
శ్రీరాం జయరాం సీతారాం
కారుణ్యాలయ శ్రీరఘురాం
దినకరఘనకుల దీపన రాం
జననుతసద్గుణసంయుత రాం
మునిజనకామిత మోహన రాం
దనుజకులైకవిదారణ రాం
విరించిసన్నుతవిక్రమ రాం
ధరాతలేశ్వర దశరథ రాం
పురాణపూరుష సురేశ రాం
సురారిగర్వవిశోషణ రాం
పవమానాత్మజ భావిత రాం
భవనుత త్రిజగత్పావన రాం
భువనేశ్వర బుధపోషక రాం
ధవళేక్షణ భవతారక రాం
నీవే దిక్కని నిజముగ నమ్మిన
జీవుడ నిక నీ చిత్తము రామా
అతిచపలాత్ముడ నతిమూఢాత్ముడ
నతిదుర్మార్గుడ నతిపాపాత్ముడ
నతిక్రూరాత్ముడ నయ్యును నీయెడ
నతివినయాత్ముడనై యనిశయంబును
దొరకిన జన్మము దురుపయోగముగ
దిరిగితి స్వల్పము లరయుచు ధరపై
మరవరాని నిను మరచి చరించితి
స్ఫురణ కలిగి యిదె శరణం బంటిని
పగవా డైనను పాదము లంటిన
తగిన విధంబుగ దయజూపెదవే
జగదీశ్వర నను సత్వర మేలగ
తగు నని తలపవె దశరథనందన
మానిత సిధ్ధులు మహిమలు యశములు
నేనెపుడైనను కోరితినా
పోనీ సిరిసంపద లైనను ఘన
భోగము లైనను కోరితినా
నీనామము నా నాలుకపైనే
నిలువ నీయమని కోరితిని
నీనిజతత్త్వము నిచ్చలు తలచే
నిలకడ నిమ్మని కోరితిని
నీనిజభక్తుల సత్సాంగత్యము
నిత్యము నిమ్మని కోరితిని
మానక నీమంగళరూపము నా
మనసున నిలుపగ కోరితిని
నిరంతరముగా నీసేవలలో
నిలచియుండుటను కోరితిని
పరమాత్ముడవగు నిను సేవించుచు
పండిపోవుటను కోరితిని
పరుల నెప్పుడును తలపక నిన్నే
భావించుటనే కోరితిని
శరణాగతవత్సలుడవు నిన్నే
శరణము మరిమరి కోరితిని
నిను నే కోరిన వన్నియు నుచితము
లని తెలిసియు కరుణించవుగా
ఘనుడవు కరుణామయుడ వైనను
నను కరుణించగ తలచవుగా
ఇనకులతిలకా దశరథతనయా
యీ బెట్టెందుకు రఘురామా
కొనకంటను నను తిలకించిన నీ
ఘనతకు లోటగునా రామా
రామనామము కన్న గొప్పది
భూమిపైనే లేదురా
భూమిపైనే కాదు సకల
భువనములలో లేదురా
మంచివారికి మంచిచేయుచు
మంచిగా రక్షించు నామము
అంచితంబుగ సర్వశుభముల
నందజేసెడు మంచినామము
సంచితములాగాములన్నియు
ద్రుంచి కాచే దివ్యనామము
మంచినామము రామనామము
మాధవుని యుత్కృష్టనామము
మందుగా భవరోగమును తన
మహిమచేతనె మాన్పు నామము
నందివాహను డెల్లవేళల
నవ్వుచు స్మరియించు నామము
అందుకొని మునిముఖ్యులందరు
హాయిగా జపియించు నామము
సుందరీమణి సీతమనసున
చిందులాడుచు నుండు నామము
వేడుకగ నాజిహ్వాగ్రమున
నాడుచుండెడి రామనామము
వాడుగక సజ్జనుల కెప్పుడు
వరములిచ్చే విష్ణునామము
మూడులోకము లందు చక్కగ
పూజలందెడు పుణ్యనామము
వాడవాడల భక్తులందరు
పాడుచుండే భవ్యనామము
నమ్మిన రాముడు నా కగుపడడే
యిమ్మహి వా డిపు డెందున్నాడో
ఎందున్నాడో యెవ్వరి కెరుకో
యిందీవరాక్షుడు యినకులతిలకుడు
మందిరశతమున మరిమరి వెదకితి
నెందును లేడే యేమైనాడో
వనముల మునులే తనవారని నే
విని యుంటిని నా విభుని జాడలను
మునిజను లందరి మనసుల వెదకితి
కనరా కెచటికి చనినాడో కద
దాగుడుమూతలు తనకు వినోదము
బాగోలే దన వశమా ఐనను
ఆగుదునా హరి నరయుచు నిటులే
సాగుదు విడవక సంతోషముగా
అధ్యక్షుడు అంటే ఆయనే.
తనను పదవి నుండి దించివేస్తే అధికారసౌధాన్ని అనుచరులను వెంటవేసుకొని పోయి ముట్టడించి గలాభా చేసారు.
పట్టుదలతో మళ్ళీ ఎన్నకలలో గెలిచి ఆ అధికారసౌధాన్ని దర్జాగా స్వాధీనం చేసుకున్నారు.
గతంలో తాను చేసిన గలాభా తాలూకూ కేసును కూడా అంతే దర్జాగా ఎత్తి అవతల పారేసారు.
ఈయన వ్యవహారశైలితో తగాదాపడి సోషల్ మీడియా తనను బహిష్కరిస్తే తానే ఒక పోటీ సోషల్ మీడియాను ప్రారంభించారు.
తనను సబహుమానంగా కవర్ చేయటంలేదు టీవీ ఛానెల్స్ అని తోచగానే వాటినీ అధికారసౌధం నుండి బహిష్కరించారు.
ఆయనకు తెలియనిది లేదు.
అలా ఉండటానికి వీల్లేదంతే.
ఆయనకు నచ్చనిది ఉండటానికి వీల్లేదు.
వీల్లేదంతే.
అలా ఉన్నది ఏదైనా కనిపిస్తే దాన్ని తనకు నచ్చినట్లు మార్చి అవతల పడేస్తారు.
జలసంధులు, ద్వీపాలు దేశాలు ఏవైనా సరే అధ్యక్షుల వారికి నచ్చకపోతే పేరు మార్చేసుకోవలసిందే.
కొత్తగా వారికి నచ్చనిది మరొకటి కనిపించింది.
దాని పేరు మార్చేసారు.
మీరు కాని ఆపాతపేరు వాడారో మీరు అద్యక్షుల వారి ఆనతిని ధిక్కరించిన నేరస్థులు ఐపోతారు.
మీరు విదేశీమూలం కలవారైతే దేశంనుండి గెంటేయకలరు జాగ్రత్తగా ఉండాలి.
మీది వేరే దేశం ఐతే మీదేశం మీద ఆర్ధికమైన ఆంక్షలు విధించగలరు.
ఇప్పుడు ప్రపంచానికి ఒక గొప్ప ప్రమాదం పొంచి ఉంది.
ఈ అద్యక్ష మహాశయులను పదవీకాలం పూర్తి అయిన పిదప నిబంధనలన్నీ మార్చిపారేసి ఐనా తిరిగి ఎన్నుకోకపోతే?
వారి ఆగ్రహం ఎంతదూరం పోతుందో?!!
వారు తమదేశం రాజ్యాంగాన్ని మార్చేస్తారా?
తమ దేశం పేరునే మార్చేస్తారా?
ఒక వేళ కొంపమునిగి అద్యక్షుల వారిని హోల్ మొత్తం ప్రపంచం ఛీ కొట్టితే? వారు దిగిపోక తప్పనిసరి పరిస్థితే వస్తే?
అధ్యక్షుల వారు దిగిపోతారా?
ప్రపంచాన్నే తిరస్కరించి పోటీ ప్రపంచాన్ని ఏర్పాటుచేస్తారా?
ఏమో!!
నీ వినోదము కొరకు నే నాడుచున్నాను
నీ వాడు మనునటులే నే నాడుచున్నాను
ధర్మానుబంధమును తగిలించునది నీవు
కర్మానుబంధములు కల్పించునది నీవు
నిర్మోహముగ నాడ నియమించునది నీవు
శర్మదుడవగుచు నను శాశించునది నీవు
నీదైన యీయాట నే నాడుచున్నాను
నాదైన యహమికయు నీదు సంకల్పమే
భేదములు వాదములు నీదు సంకల్పమే
నీదివ్యలీలలో నేను పాత్రధారిని
ఆనందముగ నిట్టు లాడించుచున్నావు
ఆనందముగ నేను నాడుచునున్నాను
ఆనంద మిర్వురకు ననవచ్చునా చూడ
నేను నీకన్న వేరుగా నుంటినా రామ
ఇదొక పెద్ద ప్రశ్న.
మనిషిని మనిషిగా చేసేది ఏమిటి?
ఈప్రశ్నకు సమాధానం కోసం ఆలోచించే ముందు ఒక విషయం గమనిక లోనికి తెచ్చుకోవాలి.
మనిషి ఒక జీవి. ముఖ్యంగా ఒక జంతువు.
జీవులు అన్నాక ఆహార భయ నిద్రా మైథునాలు అనే నాలుగు సహజ లక్షణాలు ఉంటాయి.మొదటి మూడు లక్శణాలూ స్వకీయమైన మనుగడకు అవసరమైనవి. నాలుగవది ఒక జాతిగా మనుగడకు అవసరమైనది.
జీవులు అన్నపుడు వృక్షజాతి కూడా లెక్కకు వస్తుంది.
జంతువులు అన్నపుడు అవి స్వయంచలనశక్తి కలవి కావటం వలన వృక్షజాతి కన్నా భిన్నత్వం కలవి.
జగదీశ్ చంద్ర బోస్ నిరూపించే వరకు వృక్షాలకు జీవం ఉన్నదనే పాశ్చాత్య ప్రపంచం నమ్మలేదు.
భారతీయ భావనలో వృక్షాలకు జీవం ఉందని ఏమిటి రాళ్ళకూ జీవం ఉందనే ఉదారభావన అనాది యైనది. మన శిల్ప శాస్త్రం శిలలకూ స్త్రీ పురుష లక్షణాలు చెబుతుంది.
జీవులకు ఆలోచన అనేదీ ఒకటి ఉంటుంది. నాలుగు సహజాతాలలో ఇది చెప్పబడక పోయినా, ఆలోచన కూడా ఒక ముఖ్య జీవ లక్షణం.
తాను ఉండాలీ అన్న భావన సహజాతం.
తాను సుఖంగా ఉండాలీ అన్న భావన ఆతరువాతది.
తానే సుఖంగా ఉండాలీ అన్న భావనా వైపరీత్యం ఆ తరువాత స్థాయి.
సుఖంగా ఉండాలీ అంటే ముందుగా సురక్షితంగా ఉండాలి కదా?
జీవులలో రక్షణ వ్యవస్థల గురించి మనకు నేడు బాగానే అవగాహన ఉంది.
వృక్షజాతి యైనా ప్రతికూల పరిస్థితుల్లో రక్షణకోసం ప్రయత్నాలు చేయటం గురించి తగినంత సమాచారం మనకు నేడు తెలుసు.
ఈవిధమైన ప్రాధమిక వాంఛలు రెడూ జీవులకు సహజాతాల తరువాతి లక్షణాలు ఆనుకోవచ్చును. అంటే ప్రతి జీవీ 1. తా నుండాలీ 2. తాను సుఖంగా ఉండాలీ అనేవి జీవుల మనుగడతో అనుబంధం కల మొదటి స్థాయి విషయాలు.
పురితన కాలంలో మానవుల విషయంలోనూ ఇంత వరకే కావచ్చును.
ఈస్థాయిలో జీవులకు ప్రకృతిపై ఆధిపత్యం అన్న భావన లేదు. ప్రకృతితో సహజీవనం అన్న భావనయే ఉంది.
కాని మనిషికి ఒక గమనిక ఉంది. అది ఎలా వచ్చింది అన్నది ఆలోచనీయం. ఆగమనిక ఏమిటంటే ప్రకృతి పైన తాను పెత్తనం చేయగలను అన్నది.
మనుష్యులలో కుటుంబ వ్యవస్థ ఏర్పడింది. ఐతే కుటుంబ వ్వవస్థల మూలాలు ఇతర జంతు ప్రపంచం నుండే మనీషికి అబ్బినవి కాని మానవజాతికే ప్రత్యేకంగా ఏర్పడినవి కావు.
ప్రకృతిని కొంత తెలివిగా ఉపయోగించుకోవటం విషయంలో శరీర నిర్మాణ రీత్యా ఇతర జంతువుల కన్నా మనిషికి ఎక్కువ అవకాశం దొరికింది.
ఇది క్రమంగా ఆధునిక సమాజ నిర్మాణానికి దారితీసింది.
(ఇంకా ఉంది)
