నా కొత్త వెబ్ సైట్

 

నమస్కారం.

నేటి నుండి నాసాహిత్యవ్యవసాయం ఒక కొత్త వెబ్ సైట్ ద్వారా కొనసాగుతుంది.

ఆ కొత్త సైట్ చిరునామా https://syamalarao.in/

పాఠకులు గమనించ వలసిందిగా విన్నపం.

ఈ కొత్త సైట్ ప్రస్తుతానికి శోధినిలో కనుపించదు. 

నిజానికి దీన్ని శోధినిలో చేర్చటం విషయంలో ఇంతవరకూ ఒక నిర్ణయం తీసుకొనటం జరుగలేదు.

కొత్త సైట్ ద్వారా ఇంతవరకూ నేను వెలువరించిన సాహిత్యాన్ని పుస్తకాల రూపంలో అందుబాటులోనికి తేవటం జరుగుతుంది.

కొత్తగా వెలువడే అంశాలను కొత్త సైట్ ద్వారా టపాలుగా చూపటం జరుగుతుంది. అవికూడా కాలక్రమేణా పుస్తకరూపం సంతరించుకుంటాయి.

సహృదయులైన పాఠకులను నా కొత్త వెబ్ సైట్ https://syamalarao.in/ సందర్శించ వలసిందిగా మరొక సారి వినమ్రంగా ఆహ్వానిస్తున్నాను.

అక్కడ మీవిలువైన అభిప్రాయాలను ఎప్పటికప్పుడు తెలియజేయటం మరిచిపోకండి. మీ అభిప్రాయాలు వెబ్ సైటును మరింత చక్కగా తీర్చిదిద్దేందుకు దోహదపడతాయి. సాహిత్యపరమైన అభిప్రాయాలు నా కృషికి ఇతోధింకాగా తోడ్పాటు నందిస్తాయి.

ధన్యవాదాలతో

తాడిగడప శ్యామల రావు

(శ్యామలీయం)

పొగడండీ శ్రీరాముని భువనేశ్వరుని

పొగడండీ శ్రీరాముని భువనేశ్వరుని మీరు
పొగడండీ శ్రీరాముని పురుషోత్తముని

పొగడండీ సకలదేవపూజితపదపద్ముని
పొగడండీ సకలమునిముఖ్యసంపూజితుని
పొగడండీ సకలదైత్యభుజగవైనతేయుని
పొగడండీ దశరథబహుపుణ్యావతారుని

పొగడండీ సకలభక్తపోషణాదీక్షితుని
పొగడండీ సకలహృదయపుండరీకవాసిని
పొగడండీ సకలనిగమభూషితాభిదానుని
పొగడండీ సకలమునిమోక్షదానశీలుని

నిను నమ్మితి మని యెరిగియు

 

నిను నమ్మితి మని యెరిగియు నీవో

  కనియును గననటు లున్నావు

కనుగొని మము కరుణించెడు దాకను

   నిను వదలుట యను నది లేదు

నిను నమ్మిన కరి కుయ్యిడ వైళమ

  జని దానిని రక్షించితివి

నిను నమ్మిన ద్రోవది నిను వేడగ

  ఘనముగ వలువల నొసగితివి

నిను నమ్మిన యంబరీషు గావగ

   పనిచితివి నీచక్రమును

నిను నమ్మిన సురవరులను బ్రోవగ

   యినకులమున ప్రభవించితివి

నిను నమ్మిన ఋషియాగము గావగ

  ధనువును గొని వని కరిగితివి

నిను నమ్మిన సుగ్రీవునికై 

  వాలిని మృగమన వేటాడితివి

నిను నమ్మిన సజ్జనుని విభీషణు

  ఘనముగ రాజును చేసితివి

నిను నమ్మిన హనుమంతుని బ్రహ్మగ

  ఘనసృష్టికి నియమించితివి

నిను నమ్మిన జయవిజయుల శాపము

  లను బాపగ సమకట్టితివి

నిను నమ్మిన సురవరులకు మేలుగ

  దనుజుని రావణు జంపితివి

నిను నమ్మిన సీతమ్మకు శోకం

  బును దక్షతతో తీర్చితివి

నిను నమ్మిన భక్తులమగు మమ్మును

   కనుగొని రామా కావవయా

  

నీనామమే జిహ్వ నుంచితిమి

 

నీనామమే జిహ్వ నుంచితిమి రామ

  నీరూపమే యెదను నిల్పితిమి

నీనిత్యసేవలనే యుంటిమి రామ

  నీకన్న మాకెవరు కారంటిమి

పామరత్వము వీడ లేకుంటిమి వేగ

  రామయ్య విన్నాణ మిమ్మంటిమి

కామితము నీదు కృప యంటిమి వేగ

  రామయ్య దయజూపరా యంటిమి

మామనసు నీకిచ్చినా మంటిమి వేగ

   నీమనసులోన మము గనుమంటివి

మామొరలు వినిపించుకొ మ్మంటిమి నిజము

  రామయ్య నినునమ్మి యిల నుంటిమి

సామాన్యులము మేము సర్వాత్మకా వేగ

  రామయ్య రక్షించరా యంటిమి

మేమన్యులను వేడ బోమంటిమి వేగ

  రామయ్య దయజూపరా యంటిమి

రామయ్యా కోమలహృదయా

 
రామయ్యా కోమలహృదయా
నామొరలను వినవయ్యా

అతిదుర్మార్గుడ నేనయ్యా
అతిసుశీలుడ వీవయ్యా
పతితజీవుడ నేనయ్యా
పతివందరకు నీవయ్యా

నరమాత్రుడను నేనయ్యా
పరమాత్ముడవు నీవయ్యా
శరణాగతుడ నేనయ్యా
పరమోదారుడ వీవయ్యా

భయశీలుడను నేనయ్యా
జయశీలుడవు నీవయ్యా
దయామయుడవు రామయ్యా
రయమున గావ రావయ్యా

భవసాగరమెట్లు దాటవచ్చునని యడిగేవు

భవసాగరమెట్లు దాటవచ్చునని యడిగేవు

వివర మెరిగితే దాటువిధము సులువనేవు

చిల్లరసౌఖ్యముల గోరి చిక్కుల పాల్గాక

చిల్లరసొమ్ములకు నాశ చేసి తిరుగకుండ

ఎల్లవేళలందు వెన్ను నెంచి పూజించితే

చల్లగాను నీవు భవసాగరమును దాటేవు

చిల్లరదేవతల గొల్చి చింతల పాల్గాక
అల్లరల్లరి పనులతో నగచాట్ల పాల్గాక
యుల్లమున రామచంద్రు నుంచి పూజించితే
చల్లగాను నీవు భవసాగరమును దాటేవు

కల్లగురువులను గొల్చి కడగండ్ల పాల్గాక

కల్లమతములను జేరి గబ్బెక్కిపోకుండ

నల్లనయ్య శ్రీకృష్ణుని నమ్మి పూజించితే

చల్లగాను నీవు భవసాగరమును దాటేవు

రామా యని నీవనినంత రాదా నీకు పులకింత

 

రామా యని నీవనినంత 

  రాదా నీకు పులకింత
రాము డుండగా నీచెంత 

  రాదు రాదు నీ కేచింత

రాముని పూజలు చేసేవేళల 

  రాలును జలజల కన్నీళ్ళు
రాముని కీర్తన పాడేవేళల 

  రాపడు నపుడపుడు గొంతు
రాముని చరితము చదివేవేళల 

  నీ మన సార్ద్రతనే పొందు
రాముని మంత్రము జపించు వేళల 

  బ్రహ్మానందంబే కలుగు

రాముని దయచే కలిగిన బ్రతుకును 

  రామున కర్పించితివి కదా
రామున కన్యము తలపోయక శ్రీ

  రాముని సేవించెదవు కదా
రాముని సంకీర్తనము చేయుటే 

  ప్రాణాధిక మని యందువుగా
రాముని యందే ప్రాణము నిలిపి 

  రాముని తోనే యుందువుగా

స్వగతం - 1

ఆ.వె.	ఎవరి బల్కరింతు నేమని పలుకుదు నవ్వు వారు దిట్లురువ్వు వారు పలుకకుండు నట్టి వారలే యధికులై యున్న నేను పలుకకునికి తగును
కం.	హరి తక్క నన్ను మెచ్చెడి నరు లంతగ లేని బ్రతుకు నాకు లభించెన్ హరికృపచే నటు లగుటయు నరయగ మేలనుచు దలతు నతిముదమునన్
కం.	రాముడు నాతో పలుకును రాముని స్నేహంబు చాలు లాతిజనులతో భూతలమున పొసగమిచే నేతాపము గాని జెంద నేటికి నాకున్
ఆ.వె.	కనుక మౌనమూని ఘనుని రాముని లోన దలచుకొనుచు నుంటి ధైర్యముగను జరిగినన్ని నాళ్ళు జరుగు నీరీతిగా పిదప నొరుగు దనువు పృధ్వి పైన
ఆ.వె.	అవల నన్ను దలచునట్టి వారుందురో యొక్క రైన నవని నుండ కున్న వింత యేమి యుండు విపులమౌ ధరణిపై నెవ్వ రెవని దలతు రెన్ని నాళ్ళు

నమ్మితిమి మన రామచంద్రుని

నమ్మితిమి మన రామచంద్రుని నారాయణుడని నమ్మితిమి

నమ్మిన వారికి మోక్షము కలదని నమ్మితి మయ్యా నమ్మితిమి

నారాయణుడే శ్రీరాము డని నమ్మిన తొలగును శోకము

నారాయణుడే శ్రీరాము డని నమ్మిన తొలగును మోహము

నారాయణుడే శ్రీరాము డని నమ్మిన తొలగు నవిద్యయు

నారాయణుడే శ్రీరాము డని నమ్మిన తొలగును భవము

నారాయణుడే శ్రీరాము డని నమ్మిన గలుగు వివేకము

నారాయణుడే శ్రీరాము డని నమ్మిన గలుగును సుఖము

నారాయణుడే శ్రీరాము డని నమ్మిన గలుగును జ్ఞానము

నారాయణుడే శ్రీరాము డని నమ్మిన గలుగును మోక్షము

నారాయణుడే శ్రీరాము డని నమ్మిన వారికి జయము
నారాయణుడే శ్రీరాము డని నమ్మిన వారికి శుభము
నారాయణుడే శ్రీరాము డని నమ్మిన వారికి యభయము
నారాయణుడే శ్రీరాము డని నమ్మిన వారికి మోక్షము

భవరోగానికి రామనామమే పనిచేసే మందు

భవరోగానికి రామనామమే పనిచేసే మందు

శివుడే చెప్పిన చక్కని మందు జిహ్వమెచ్చు మందు

రోగమెంతగా ముదిరిపోయినా బాగుచేయు మందు

యోగుల భోగుల కందరికీ యిది యోగ్యమైన మందు

రోగకారకము లగు కర్మంబుల నీగ జేయు మందు

బాగు చేసి స్వస్థితి చేకూర్చెడు భలే మంచి మందు

ఎట్టి పరిస్థితిలో పనిచేసెడు నెదురు లేని మందు

గట్టి శ్రధ్ధతో సేవించినచో ఘనతచూపు మందు

ముట్టగనే జిహ్వాగ్రంబును పని మొదలుపెట్టు మందు

వట్టిమాట లివి కావు పెద్దలకు పనిచేసిన మందు

నిన్ను నమ్మి యుంటి రాఘవా

నిన్ను నమ్మి యుంటి రాఘవా నే

నెన్న నితరు లెవరి నైన

కరిరాజును కాచినట్టి ఘనుడ వనుచు నమ్మితి

ధరను ధర్మపరుల గావ దక్షుడ వని నమ్మితి

పరమదయామూర్తి వనుచు బాగుగ లోనమ్మితి

వరద జన్నజన్మములుగ బాగా నమ్ముకొంటిని

అన్నిలోకములకు దిక్కు వనుచు నిన్ను నమ్మితి

పన్నుగ నాపన్నుజన బంధుడ వని నమ్మితి

తిన్నగ నావెతలు దీర్చు దేవుడ వని నమ్మితి

ఎన్నెన్నో జన్మములుగ నిన్నే నమ్ముకొంటిని

కలిబాధను నివారించ గలుగుదు వని నమ్మితి

ఇలను నేను పుట్టుట యిక కలుగదని నమ్మితి

కొలుచు నాకు మోక్షము చేకూర్చెదవని నమ్మితి

జలజనయన నిన్ను నేను చాలా నమ్ముకొంటిని

ఈశ్వరానుగ్రహమే

ఈశ్వరానుగ్రహమే యిన్నిటికిని మూలము

ఈశ్వరానుగ్రహమే యిచ్చు నీకు సర్వము

ఏది నీకు లభించిన నీశ్వరానుగ్రమే

ఏది నీకు దొరుకకున్న నీశ్వరానుగ్రహమే

ఏది నీకు సాధ్యమైన నీశ్వరానుగ్రహమే

ఏది నీ కసాధ్యమైన నీశ్వరానుగ్రహమే

ఎవరు నీకు హితులైన నీశ్వరానుగ్రహమే

ఎవరు నీ కహితులైన నీశ్వరానుగ్రహమే

ఎవరు నిన్ను నమ్ముచున్న నీశ్వరానుగ్రహమే

ఎవరు నిన్ను నమ్మకున్న నీశ్వరానుగ్రహమే

ఇదిగో హరిభక్తి కలుగు నీశ్వరానుగ్రహమే

ఎదలో రామయ్య నిలుచు నీశ్వరానుగ్రహమే

ఇదిగో తారకము దొరకు నీశ్వరానుగ్రహమే

ఇది నీకు ముక్తి నిచ్చు నీశ్వరానుగ్రహమే

నీరాము డొక్కడే నీకు తోడు

నీరాము డొక్కడే నీకు తోడు

నీరాముని యండే నీకు చాలు

ఎవరిమాట పట్టుకొని యీభూమికి వచ్చావో

ఎవరియండ నమ్ముకొని యీభూమికి వచ్చావో

ఎవరిసేవ చేయుటకై యీభూమికి వచ్చావో

శివదేవుని యాన వాడె శ్రీరాముడె నీతోడు

సకలసుజనకోటి కిలను శరణమైన వాడెవరో

సకలలోకములకు సతము శరణమైన వాడెవరో

సకలలోకపతులకను శరణమైన వాడెవరో

వికచసరోరుహాక్షుడా వీరరాఘవుడె తోడు 

హరిమెచ్చిన చాలునని

 

హరిమెచ్చిన చాలునని యనుకొన వయ్యా శ్రీ

హరిమెచ్చిన యిచ్చుమోక్ష మనుకొన వయ్యా

హరిని యాత్మీయుడని యంతరంగ మందెంచి

హరిప్రీతిగ సత్కర్మము లాచరించుచు నిలచి

హరిభక్తుల నిరంతరం బాశ్రయించి సేవించి

హరినామము నాలుకపై నన్ని వేళలను నిలిపి

హరు డొసగిన భవతారక మతిప్రేమగ ననుష్ఠించి

హరుని వోలె మనసు హరిధ్యానమందున నిలిపి

హరేరామ మంత్రము నీ వర్హుల కుపదేశించి

హరికే నీ జీవితంబు నంకితం బనగ నిలిపి

ననుజూచి నవ్విన నాకేమి రామ

ననుజూచి నవ్విన నాకేమి రామ

ననుజూచి యేడ్చిన నాకేమిరా

మనసార యొకమంచి మాట నేచెప్పితే

విని కించపడి కోపమున నెవ్వరో

వినరాని యనరాని వింతమాటల తోడ

మనసునొవ్వగ దుడుకు లనినంత నాకేమి

నినుజూచి సంతోషమున నేను పాడుటను

గని యోర్వలేని దుర్జను లెవ్వరో

మనసులో కిల్బిషము మాటలో మోములో

కనుపింపగా వికవికలు బోవ నాకేమి

నీకరుణ నాకుండ లోకాన నెవరేమి

ఆకతాయి మాటలాడితే నాకేమి

నాకు నీవండయై నడిపించుచుండగా

చీకాకు నరుల వీక్షింపగా నాకేల

రండి రండి

రండి రండి మనగడపకు 

  రాములవా రొచ్చారు

వెండిచెంబులతో నీళ్ళు 

  తెండి కాళ్ళు కడుగుదము

సీతమ్మ మనయమ్మ శ్రీరాములతో కూడ

ప్రీతితో మనయింటికి విచ్చేసెను చూడండి

ఈ తల్లిదండ్రులకు యిచ్చి యర్గ్యపాద్యములు

చేతులార పూజింతము చెంగున రండి

అన్నవెంట లచ్చుమన్న యరుదెంచెను చూడండి

అన్నగారి కుడిభుజం బందురుగా యతడిని

వెన్నంటి దేవుళ్ళను వేడుకతో మారుతియును

తిన్నగా యిదే వచ్చుచున్నాడు మనయింటికి

చూడ రున్నవాళ్ళా యని సుజనులైన చాలునని

వేడుకతో మనయింటికి విచ్చేసిరి దేవుళ్ళు

నేడు మనభాగ్యంబులు నిశ్చయముగ పండెనుగా

మూడులోకముల నేలువాడే విచ్చేయుటచే

ఏమన్నా అనుకోనీ ఎవరైనా

ఏమన్నా అనుకోనీ ఎవరైనా నీకేమీ

రామన్నే నీతోడై రాగా యిక భయమేమీ

ఏవేవో మాట్లాడే యీలోకం నినుగూర్చి

ఈవే ళేనిందలనో ఎన్నైనా వేస్తున్నా

వావిడచి దుఃఖించగ పనియేమీ లేదోయీ

ఆవెర్రుల ప్రేలాపన లాకర్ణించకు మోయీ

తప్పెంచిన దీలోకం తల్లిని సీతమ్మోరిని

తప్పెంచిన దీలోకం తండ్రిని మన రామయ్యను

తప్పెంచిన లోకాన్నే మెప్పించిన రామయ్యను

మెప్పించిన నినుజూచి నీతప్పుల  నేయెంచుచు

భయమెందుకురా

భయమెందుకురా భయమెందుకురా

  భగవంతుడు లేడా

జయమంగళకారకుడై రాముడు

  సహాయముగ రాడా

నిరుపణసద్గుణశీలుడు రాముని

  నిర్మలచరితము వినలేదా

కరుణామయుడగు శ్రీరఘురాముని

  ఘనతను చక్కగ వినలేదా

పరమోదారుడు జానకిరాముడు

  పరమసులభుడని వినలేదా

శరణార్ధులను విడువక రాముడు

  చక్కగ కాచుట వినలేదా

శరణమన్న సుగ్రీవుని రాముడు

  చక్కగ కాచుట వినలేదా

శరణమంబను విభీషణు రాజుగ

  హరి చేసెనని వినలేదా

శరణంబను కాకసురు రాముడు

  కాపాడినది వినలేదా

శరణంబన పామరుడ వైన నిను

  సాకక రాముడు విడిచేనా

సుఖము

మనుజులతో నంటకాగినలేదు సుఖము

పెనగొని హరిపాదయుగళి కనుగొనుము సుఖము

తమతమ సుఖంబునకై తహతహలాడు వారి

భ్రమపడి నీవాశ్రయించి బడయలేవు సుఖము

భ్రమలన్నియు విడువుమా రాఘవుని చేరుమా

విమలగుణోన్నతుని శరణు వేడు మదే సుఖము

ఏవేవో కూటి విద్యల నెంతగాను నేర్చిన

భావింపగ నొక్కింతయు బడయలేవు సుఖము

నీవన్నియు విడువుమా నేడు హరిని చేరుమా

నీవాడను శరణంబని నిలువు మదే సుఖము

నిమిషాంబికాదర్శనం.

 

ఈరోజు అనగా ఆదివారం 2026 ఏప్రిల్ ఐదవతారీఖున సాయంకాలం హైదరాబాదు నగరంలోని బోడుప్పల్ ప్రాంతంలో కొలువైన నిమిషాంబికా అమ్మవారిని దర్శించుకున్నాను.

మాచెల్లెలు లక్షి, మాబావగారు హరి గారూ తాము వెళ్తూ నన్ను కూడా తీసుకొని వెళ్ళారు.

వారిద్దరూ గోత్రనామాలతో అర్ఛన చేయించుకున్నారు. 

నేను దండం పెట్టుకున్నాను.

అనంతరం అమ్మకు ఒక కీర్తనను సమర్పించుకున్నాను. దానిని అమ్మ భక్తుల సౌకర్యార్ధం ఈటపాలో పొందుపరుస్తున్నాను.

నిమిషాంబికే జగదంబికే
   నిత్యాదితిథిదేవతాపూజితే
సుమాండు జనుమాండు సురవైరిప్రాణవి
   శోషణామితపరాక్రమశోభితే

శక్తౌఘసంపూజ్యచరణారవిందే
భక్తావనానిపుణపావనమూర్తే
ముక్తకమునివర్యపుణ్యావతారే
ముక్తిదాయకజగన్మోహనమూర్తే

తాపాంతకే జనదారిద్ర్యనాశిని
పాపాంతకే సురవరపూజితే దేవి
శాపాంతకే భవచక్రాంతకే దేవి
శ్రీపార్వతీ శివప్రియభామినీ దేవి

నిమిషాంబికా అమ్మవారికి కర్నాటకలో ఒక ఆలయం ఉంది. ఇది మరొకటి.

అమ్మవారిని దర్శించున్న తరువాత చాలా సంతోషం కలిగింది.

ముఖ్యంగా అమ్మవారికి సమర్పించిన కీర్తనను తల్లి తన సమక్షంలోనే గానం చేసే భాగ్యం కలగించినందుకు మరింత సంతోషం కలిగింది.