సాకేతనాయక సకలలోకనాయక

సాకేతనాయక సకలలోకనాయక
శ్రీకర మమ్మేలు సీతానాయక

మామాటలు మాచేతలు మాతలపులు మాచూడ్కులు
మామనసులు మాబ్రతుకులు మాచదువులు మానడతలు
మాముక్తులు మాశక్తులు మాధనములు మాయాశలు
మామాధవదేవ నీవు మాకిచ్చినవే

నీతేజము నీరూపము నీశౌర్యము నీబలము
నీతత్త్వము నీశాంతము నీవేగము నీగుణము
నీతాల్మియు నీవిభవము నీయీవియు నీదయయు
మాతండ్రి నిలువనిమ్ము మాకు రక్షగా

నిన్ను నమ్ముకొన్నట్టి నిన్ను సేవించునట్టి
నిన్ను కీర్తించునట్టి నిన్ను పూజించునట్టి
నిన్ను ధ్యానించునట్టి నిజభక్తులమగు మమ్ము
మన్నించి రక్షించవె మానక నెపుడు