వినుడు వినుడు నామనసు వెఱ్ఱియైనది
అనవరతము హరే హరే యనుచున్నది
హరేరామ హరేరామ యనుచు నున్నది
హరేకృష్ణ హరేకృష్ణ యనుచు చున్నది
హరే నరసింహాయని యరచుచున్నది
నిరంతరము నీరీతిగ నెగడుచున్నది
ఆనందము హరినామం బనుచు నున్నది
ఆనందము కావన్యము లనుచు నున్నది
తానన్నపానములను తలపకున్నది
మాని యితరవృత్తులను మసలుచున్నది
హరి దీనికి మత్తుపెట్టి నట్టులున్నది
హరి కన్యము లేనేలే దనుచు నున్నది
హరిని తలపకుండు టెట్టులనుచు నున్నది
హరివశమై యిది యన్యము లరయకున్నది
