నేర మేమున్న దని నీ మౌనము

నేర మేమున్న దని నీ మౌనము మన
సార నిను కోరి కొలిచేర రఘువీర

వేళపాళ లేక పాడి విసిగించితినా కరు
ణాలవాల నీమాటలు నమ్మనంటినా మతి
మాలి చెడుస్నేహములు మరగినానా బ్రతి
మాలినను వినవేమని మండిపడితినా

కలలనైన నిను కలియుట కరువైనది నీ
పలుకరింపు లేక బ్రతుకు బరువైనది మా
టలకు నీవు లొంగవని యర్థమైనది నా
వలన దోసమేమున్నదొ తెలియకున్నది

ఘోరపాపవిదారణము కోరితి నంతే తని
వార నిను కీర్తించగ వలచితి నంతే దు
ర్వారమైన భవముదాట తలచితి నంతే సం
సార మింక చాలునని సణగితి నంతే