చకచక బాణాలు సంధించరాదా

చకచక బాణాలు సంధించరాదా
ప్రకటించి విల్లెత్తి వికటబుధ్ధుల పైన

కపటబుధ్ధుల వారు కల్లబ్రతుకుల వారు
విపరీతములు చేయు వేడ్కల వారు
అపకారులై జనుల నణగద్రొక్కుచు నుండ
తపనపడు మమ్మేల తడయగ నేలా

తెలుగింటి ఘనకీర్తి కలతబారుచు క్రుంగ
కలుషబుధ్ధులు నేడు గంతులువేయ
వెలతెల బోవు మా తెలుగు తల్లిని బ్రోవ
తులలేని విలుకాడ తొందరపడ రాదా

శూరుడ నీవిటుల జూచుచు నూరకున్న
నేరగాళ్ల పాలగును నేల సమస్తము
శ్రీరామ నీవారు చిక్కులు పడుచుండ
కారుణ్యమును జూపి కాపాడ రాదా