నావంటి వానిపైన

నావంటి వానిపైన నీవు దయ చూపుదువని

భావించెడు నంత వెఱ్ఱివాడను కాను

సదాచారమేమి లేదు చట్టుబండయును లేదు

ముదమున నీపూజచేయు ముచ్చటలేదు

కదిలి నీగుడికి వచ్చి ఘడియ యుండుట లేదు

వదలక నీనామమైన పలుకుట లేదు

నీభక్తులసావాసము నేను చేయుట యేడ

శోభనాకార భక్తి సుంతయు లేదు

వైభవముగ నీకు భజన నేనుచేయుట యేడ

నీభజనలు జరుగుచోట నిలుచుట లేదు

ఏముఖమునుపెట్టుకొని యిపుడు నీదయవేడుదు

నీమంచితనము మీద నెపముంచుదును

రామచంద్ర నాకు మంచి లక్షణ మొక్కటి లేదు

ఏమో నాదురాశతప్ప యేమియు లేదు