ఏల నితరము లందు మేలెంచుట

ఏల నితరము లందు మేలెంచుట

మేలెంచి భంగపడి జాలొందుట

శ్రీరామచంద్రుని నామంబునే గాక  

    జిహ్వ కన్యము పల్క నేల

శ్రీరామచంద్రుని రూపంబునే గాక 

    ప్రీతి నక్షుల జూడ నేల

శ్రీరామచంద్రుని పూజించనే గాక 

    చేతు లీరెండు మన కేల

శ్రీరామచంద్రుని పాదంబులకు గాక 

    శిరసు వంచగ నెంచ నేల

శ్రీరామచంద్రుని సంకీర్తనము గాక 

    చెవిబెట్ట నుంకించ నేల

శ్రీరామచంద్రుని చరితంబునే గాక 

    యారాటముగ చదువ నేల

శ్రీరామచంద్రుని భక్తకోటిని గాక 

    చేరి యన్యుల గొల్వ నేల

శ్రీరామచంద్రుని యశము జాటగ గాక 

    క్షితిపైన నుండగా నేల

శ్రీరామచంద్రుని క్షేత్రంబులను గాక 

    చేరగా కోరగా నేల

శ్రీరామచంద్రుని సేవించనే గాక 

    జీవితం బిది యుండ నేల

శ్రీరామచంద్రుని దివ్యతత్త్వము గాక 

    చిత్తంబు చింతించ నేల

శ్రీరామచంద్రుని చేరుకొనుటయె గాక 

    వేరొండు యాశ లింకేల