శ్రీరాముల కీర్తనమును

శ్రీరాముల కీర్తనమును చేయవలయును
దారుణభవసాగరమును దాటవలయును

వారి వీరి గొలుచుబుధ్ధి వదలవలయును
నారాయణసేవకే నడువవలయును
ఊరివారి గొడవలలో దూరుట మాని
తీరుగ హరిభక్తులతో చేరవలయును

తలపులు హరిచరితములే తడువవలయును
పలుకులు హరినామములే పలుకవలయును
వలచిన హరిచేరికనే వలచవలయును
నిలచిన హరిసన్నిధినే నిలువవలయును

హరిమయ మీవిశ్వమనున దెఱుగవలయును
హరికన్యము మిథ్య యనున దెఱుగవలయును
హరేరామ యనుచు నెపుడు మురియవలయును
హరేకృష్ణ యనుచు జగము మరువవలయును