15, డిసెంబర్ 2020, మంగళవారం

శివలింగముపై చీమప్రాకిన

శివలింగముపై చీమప్రాకిన
శివునకు కొరత కలిగేనా ఆ
చీమకు ఘనత కలిగేనా

సజ్జనుని గని దుర్జను డరచిన
సజ్జనునకు దుర్గతి కలదా ఆ
దుర్జనునకు సద్గతి కలదా

భక్తుని పామరు డెంత తిట్టిన
భక్తుని ఘనత తొలగేనా ఆ
పామరునకు ఘనతబ్భేనా

ఏనుగు వెడలిన కుక్క మొఱగిన
ఏనుగు దర్జా తొలగేనా ఆ
కుక్కకు దర్జా కలిగేనా

సూర్యునిపై నొక డుమిసి నంతట
సూర్యుని తేజము తరిగేనా ఆ
ధూర్తుని మొగమే తడిసేనా

గుడిలో దేవుని కూడని వడుగ
వడి దేవుడు వరమిచ్చేనా ఆ
అడుగువాడు చెడిపోయేనా

హరిహరులకు బేధముల నెంచిన
హరిహరులకు వాదయ్యేనా ఆ
నరునకు నరకం బయ్యేనా

రాముని రాక్షసు లెంత తిట్టిన
రాముని యశమది తరిగేనా ఆ
రాక్షసులకు యశ మబ్బేనా

వీరిచే పోస్ట్ చేయబడింది వద్ద
లేబుళ్లు:

9 కామెంట్‌లు:

  1. sarma15 డిసెంబర్, 2020 2:26 PMకి

    గుడిలో దేవుని కూడని వడుగ
    వడి దేవుడు వరమిచ్చేనా ఆ
    అడుగువాడు చెడిపోయేనా
    అర్ధం కాలేదండి

    రిప్లయితొలగించండి
    రిప్లయిలు
    1. శ్యామలీయం15 డిసెంబర్, 2020 4:03 PMకి

      గుడిలోనికి వెళ్ళి దేవుణ్ణి అడుగకూడనివి ఇమ్మని అడిగితే ఆ దేవుడు అలాంటి వరం ఇస్తాడా? అలా అడిగినందుకు గాను ఆ అడిగిన మూర్ఖుడే చెడిపోతాడు కాని అని తాత్పర్యం.

      తొలగించండి
  2. Jai Gottimukkala15 డిసెంబర్, 2020 5:02 PMకి

    భక్తుని పామరు డెంత తిట్టిన
    భక్తుని ఘనత తొలగేనా ఆ
    పామరునకు ఘనతబ్భేనా

    పామరుడు అన్న పదం భక్తుడికి వ్యతిరేకార్ధ పదం కాదేమోనండీ. ఛందస్సు నియమాల ప్రకారం కుదిరితే ఇలా అనవచ్చా?

    భక్తుని *నాస్తికు*డెంత తిట్టిన
    భక్తుని ఘనత తొలగేనా ఆ
    *నాస్తికు*నకు ఘనతబ్భేనా

    రిప్లయితొలగించండి
    రిప్లయిలు
    1. శ్యామలీయం15 డిసెంబర్, 2020 6:40 PMకి

      కేవలం వ్యతిరేకపదం కాక ఇంకా విస్తృత మైన పదంగా పామరశబ్దం వాడాను. మీరన్నదీ ‌బాగానే ఉంది.

      తొలగించండి
    2. Jai Gottimukkala15 డిసెంబర్, 2020 7:07 PMకి

      Thank you Sir.

      మీకు తెలిసే ఉంటుంది కానీ చదువరుల కొరకు ఆసక్తికర విషయం:

      దేవుని సందేశం అందని వారిని పామరులు అనడం అన్ని మతాలలో ఉన్నట్లుంది. ఇస్లాం పూర్వ అరేబియాను జాహిల్ (age of ignorance) అంటారు. ఏసు సిలువ సమయంలో "వీరిని మన్నించు, తాము ఏమి చేస్తున్నామో వారికి తెలియదు" అంటాడు.

      తొలగించండి
  3. Chiru Dreams15 డిసెంబర్, 2020 5:25 PMకి

    అసలు నీకేం కావాలో దేవుడికంటే బాగా నీకే తెలుసా?

    రిప్లయితొలగించండి
    రిప్లయిలు
    1. శ్యామలీయం15 డిసెంబర్, 2020 6:48 PMకి

      ఎవరి కేమి కావాలో ఆయనకు తెలుసు. ఆయన దయవలన నాకేమి కావాలో నాకు తగినంతగా తెలుసు. మీకేమి కావాలో మీకూ కొంత స్పష్టత వస్తుంది - కాని దానికి మీ కింకా సమయం ఉంది. ఈమాటలు మీరు నమ్మకపోయినా ఫర్వాలేదు. పొడిగించ ప్రయత్నించకండి. ఇంతకన్న చెప్పటం వీలుకాదు. మన్నించాలి.

      తొలగించండి
    2. సూర్య16 డిసెంబర్, 2020 6:05 AMకి

      Faith is a gift that some people are yet to receive!

      తొలగించండి
  4. Aruna tolety17 డిసెంబర్, 2020 1:50 PMకి

    చాలా చక్కగా వివరించావు.నిజమే కదా..వే విధముల ఘనత కలిగినట్టి ప్రతిభకు మరకలంటించ వసమా.. తగునా..కాంతిని గుప్పిట బంధించలేము కదా..అర్హత కలిగినట్టి ప్రాముఖ్యానికి సవినయంగా నమస్కరించి గౌరవంగా పక్కకు తప్పుకోడమే ఉత్తమం.లేకపోతే అని అనిపించుకోడం అవుతుంది.
    భక్తుని గూర్చిన ప్రస్తావన లో నాస్తికునితో ఉదహరించి వ్రాస్తే బాగుంటుంది

    రిప్లయితొలగించండి

ఆమోదించిన వ్యాఖ్యలే ప్రచురితం అవుతాయి. తరచుగా పరిశీలించటం వీలు కాదు కాబట్టి అప్పుడప్పుడు వ్యాఖ్యలు కనిపించటం ఆలస్యం కావచ్చును. తరచుగా జవాబులు ఇవ్వటం నాకు వీలు కాదు. ఎక్కువగా చర్చించటం అస్సలు వీలుకాదు.

దీనికి సబ్‌స్క్రయిబ్ చేయి: కామెంట్‌లను పోస్ట్ చేయి (Atom)