10, మార్చి 2015, మంగళవారం

పాడెద నేను హరినామము


పల్లవి.
పాడెద నేను హరినామమును వేడుక మీఱగ వేయినోళులను
ఆడుచుపాడుచు అన్ని వీధుల తిరుగాడెద హరిదయ వేడుకొనుచును


ఇది నేను సంకల్పించి వ్రాసినది కాదు.  చిత్రంగా నేటి ఉదయం వేకువఝామున ఈ‌ పల్లవిని పాడుతూ వీధుల్లో తిరుగుతున్నట్లుగా స్వప్నం కలిగింది. అందు చేత, ఆ పల్లవితో కీర్తనను పూర్తిచేసి బ్లాగులో ఉంచుతున్నాను. అదృష్టవశాత్తు ఈ పల్లవిని హిందోళంలో గానం చేసిన విధానం దాని ఆలాపనతో‌ సహా మనస్సులో సుస్థిరంగానే ఉంది. ఐతే మరొక్క మాట. ఇటువంటి విషయాలు బ్లాగులో ఉంచితే కొందరి అపనమ్మకం కారణంగా అక్షేపణలు వచ్చే అవకాశమూ  ఉంది కాబట్టి ఈ విధంగా ప్రకటించుకోవటం అంత మంచిది కాదన్న సలహా ఒకటి గతంలో ప్రకటించిన ఒక కీర్తన సందర్భంలో కొందరు విజ్ఞులనుండి అందిన సంగతి నేను మరువలేదు. కాని ఈ‌ సంగతిని లిఖితపూర్వకంగా పదిలపరచుకొనని పక్షంలో అది మరుగున పడిపోతుంది కదా?  అందుకని విషయం వెల్లడించుకొని వ్రాయటమే ఉచితం అన్న నిర్ణయానికి వచ్చి, కీర్తనతో పాటే సంగతి సందర్భాలనూ వివరిస్తున్నాను.




పాడెద నేను హరినామమును వేడుక మీఱగ వేయినోళులను
ఆడుచుపాడుచు అన్ని వీధుల తిరుగాడెద హరిని వేడుకొనుచును

ఇచ్చగించి ముల్లోకములు లచ్చిమగడు కలిగించి
ముచ్చటగ వేయికనుల నిచ్చలు సంరక్షించు
అచ్చమైన సత్యమిది మెచ్చక తృణీకరించి
మచ్చరించు వారలకు హెచ్చరిక కలుగునటుల  ॥పాడెద నేను॥

రేయి లేదు పవలు లేదు రేపు బుధ్ధి తెలియుట లేదు
మాయలోన మునిగియున్న మనిషికి మెలకువ లేదు
మాయదారి కలి నణచ మరియొండు దారియె లేదు
వాయివిడచి హరిని వేడ వలెనని జనులు తెలియ ॥పాడెద నేను॥

భక్తులైన వారికి కలి భయ మెన్నటికిని లేదు
శక్తికొలది చేసిన రామజపము వృధాయగుట లేదు
ముక్తి నిచ్చు రామ మంత్రమునకు సాటి వేరు లేదు
యుక్తి తెలిసి జనులు రామ భక్తులై తరించునటుల ॥పాడెద నేను॥


3 వ్యాఖ్యలు:

  1. టపాకు సంబంధం లేని వ్యాఖ్య.

    ఈ మధ్య మీ ఆరోగ్యం బాలేదన్నారు. ఆ తరువాత కొద్ది రోజులు మీరు అంతర్జాలంలో కనిపించలేదు. ఇప్పుడు పూర్తిగా కోలుకున్నారని ఆశిస్తాను.

    ప్రత్యుత్తరంతొలగించు
    ప్రత్యుత్తరాలు
    1. ఇంకా పూర్తిగా కోలుకోలేదండీ. ఆరోగ్యం కుదుటపడేందుకు మరికొద్ద్ది రోజులు పట్టేలా ఉంది. ఔషధసేవనం నడుస్తున్నది. దానికి తోడు కంటివైధ్యుని వద్దకూ వెళ్ళవలసి ఉంది - రేపు వెళ్ళాలనుకుంటున్నాను. ఓపిక లేదు కాని, వృత్తిగతమైన ఒత్తిళ్ళు ఉంటాయి కదా ఉద్యోగజీవనులకు. అందుచేత కార్యాలయానికి అంకితం కాక తప్పని పరిస్థితి. ప్రోడక్ట్ రిలిజ్ అనేది ఒకటి జరూరుగా ఉన్నది కాబట్టి కళ్ళంతగా ఇబ్బంది పెడుతున్నా పనిచేయక తప్పనిసరి. కొద్ది రోజుల్లో అంతా చక్కబడవచ్చును.

      తొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.