చిరునగవు మోమున చిందులాడుచు

చిరునగవు మోమున చిందులాడుచు నుండు
కరుణామయుడ నన్ను కరుణించవే

యజ్ఞభావిత రామ యజ్ఞసంభవ రామ
యజ్ఞరక్షక రామ యజ్ఞేశ రామ
యజ్ఞవర్థన రామ యజ్ఞాంగ శ్రీరామ
విజ్ఞాపనము నీవు విని నన్ను బ్రోవవే

సర్వవిజ్జయ రామ సర్వమోహన రామ
సర్వార్థప్రద రామ సర్వేశ రామ
సర్వకారణ రామ సర్వజ్ఞ శ్రీరామ
సర్వవాగీశ్వరేశ్వర నన్ను బ్రోవవే

మునిజనాశ్రయ రామ ఘనవిక్రమ రామ
జనకజా పతి రామ జననాథ రామ
వనజనేత్ర రామ శిష్టేష్ట శ్రీరామ
ఘనదుఃఖవారక నను వేగ బ్రోవవే