నీ కోసం కట్టిన యీ గుడిలో
రాకాసులు యెటులో చేరినవి
నీ కొలువు కెవరూ రాకుండా
వాకిటనే అవి కాపుండినవి
రసనారాజద్వారము ముంగిట
నామము లాడుట యాగినది
చెవుల గుమ్మముల చెంగట మ్రోగే
శుభగుణ గానము లాగినవి
నేత్రద్వారములందిచే శుభ
హారతి వెలుగులు సమసినవి
సకలద్వారముల పూజాప్రకరణ
విధులను మూకలు మూసినవి
దేహాలయమున నరిషడ్వర్గము
దూరిన దెటులో తెలియదయా
పూజలాగినవి వేగమె వాటిని
తరిమే దెటులో తెలుపవయా
