23, అక్టోబర్ 2017, సోమవారం

రామా రామా రామా యనుమని


రామా రామా రామా యనుమని రాముని కీర్తన పాడుమని
మీ మీ పెద్దలు బోధించిరని మీ రెరుగుదు రది మరచిరని

కామితార్థములు ఘనముగ నొసగే రామచంద్రునే మరచిరని
ప్రేమగ నొకపరి పిలచిన పలికే స్వామినామమే మరచిరని
కామక్రోవవశులై మీరు కాని పనులతో చెడితిరని
మీ మనసులకే తెలియునుగా మిక్కిలి కుందుచు నుంటిరిగా

రామనామమే హరినామంబుల రమ్యతరంబని తెలియుడయా
రామనామమే హరిదయ గొనుటకు రాజమార్గమని తెలియుడయా
రామనామమే సప్తకోటిమంత్రముల దొడ్డదని తెలియుడయా
రామనామమే ముక్తిమార్గమని మీ మీ‌మనసుల తెలియుడయా

జరిగిన దేదో జరిగిన దికపై చక్కగ రాముని నామమును
మరువక మీరు మనసున నిలిపుట మంచిదని లో నమ్ముచును
తరియించుడయా దానికి మించిన తరణోపాయము చూడగను
ధరనే కాదీ త్రిభువనములలో దొరుకదు దొరుకదు జనులారా


వ్యాఖ్యలు లేవు:

వ్యాఖ్యను పోస్ట్ చెయ్యండి

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.