29, సెప్టెంబర్ 2011, గురువారం

సుఖం

తిరుగలిలో పడిన గింజకు
తిరుగుటలో సుఖ మున్నదా
నలుగుటలో సుఖమున్నదా
అని యడిగే నోరున్నదా

చీకటి వెలుగుల లోకమనే
తిరుగలి లో పడిన జీవికి
మెలకువలో సుఖమున్నదా
నిద్దురలో సుఖమున్నదా

పాపపుణ్యముల లోకమనే
తిరుగలి లో పడిన జీవికి
ఉదరముచే సుఖమున్నదా
హృదయముచే సుఖమున్నదా

ఆశనిరాశల లోకమనే
తిరుగలి లో పడిన జీవికి
చేతికంది సుఖమున్నదా
చేయిజారి సుఖమున్నదా

చావు బ్రతుకుల లోకమనే
తిరుగలి లో పడిన జీవికి
వచ్చుటలో సుఖమున్నదా
చచ్చుటలో సుఖమున్నదా

2 వ్యాఖ్యలు:

  1. జీవిత సత్యాన్ని అక్షరాలలో చూపించారు

    ప్రత్యుత్తరంతొలగించు
  2. సోక్రటీసు మహాశయులు పూర్వం ప్రశ్నల ద్వారా వేదంతాన్ని , సత్యాన్ని చూపేవారని.. రమణ మహర్షి "నీవెవరు ?" అన్న దాని ద్వారనే పరమార్ధం బోధ చేసేవారని విన్నాము , చదువుకున్నాము .... ఈ కవితని కేవలం కవితలా కాకుండా, ఆత్మావలోకనపు సాధనంగా ఉపయోగించుకోవచ్చు ... అభినందనలు ...

    ప్రత్యుత్తరంతొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.