నారాయణ యని

నారాయణ యని నా తండ్రీ యని నోరారా పిలవండి 
శ్రీరామా యని శ్రీకృష్ణా యని నోరారా పిలవండి

ముప్పొద్దులను మెక్కుటకేనా మూతి దేవుడిచ్చె

ఇప్పటికైనా తెలివి తెచ్చుకొని యీశుని పిలవండి

తప్పుడుమాటలు పలుకుటకా హరి తలకు తెలివినిచ్చె

తప్పు తెలుసుకొని హరినామములే యొప్పుగ పలకండి

దేవుళ్ళాడగ రుచులకు జిహ్వను దేవుడిచ్చినాడా

శ్రీవిభునామము నిప్పటికైనా జిహ్వకు చేర్చండి

దేవుడు నరులను పొగడుటకేనా తెలివికి నీకిచ్చె

దేవదేవుని నామము పలికే తెలివి తెచ్చుకోండి