వరమీవయ్యా రామ వరమీవయ్యా మంచి
వరమీవయ్యా నాకు వరమీవయ్యా
పరమపురుష నీనామ స్మరణమును మరువకుండ
పరమభాగవతుల స్నేహబాంధవ్యము లబ్బునటుల
నిన్ను గాక నేనన్యుల నెన్నడును స్మరించకుండ
నిన్ను తిట్టు నీచులతో నెన్నడు పనిబడకుండగ
సిరులపైన వ్యామోహము చెందకుండ నాచిత్తము
నిరంతరము నీయందే నిలిచియుండ నాచిత్తము
తవులకుండ పాపపుణ్యద్వంద్వము నాకికపైన
భవచక్రము పగులదన్ని వచ్చునటుల నీవద్దకు
