నేలకు దిగివచ్చిన

నేలకు దిగివచ్చిన ఓ నీలమేఘశ్యాముడా

వేలవేల దండాలివె విష్ణుదేవుడా 

బాలుడా పెరిగి పెద్దవాడ వగుట యెప్పుడు

ఆలములో రావణుని యంతుచూచు టెప్పుడు

మేలుచేయు టదెప్పుడు మేదినికిని మాకును

లీలామానుషవిగ్రహ బాలరాముడా

కాలుమోపు టది యెపుడు కాంతారములలోన

కాలుమోపు టెపుడు లంకాపురి పొలికలనులో

కాలున కా రావణుని కాను కిచ్చే దెప్పుడు

లీలామానుషవిగ్రహ బాలరాముడా

ఏలు టెప్పు డీధరను మేలుగా జనాళికి

కాలమునకు నిలిచెడు ఘనతచాటు టెప్పుడు

చాల భక్తవరదుడని జనులెరిగే దెప్పుడు

లీలామానుషవిగ్రహ బాలరాముడా