ఒప్పులేమి లేవాయె తప్పులేమొ కొల్లలాయె

ఒప్పులేమి లేవాయె తప్పులేమొ కొల్లలాయె
నిప్పు డెమి చేయువాడ నీశ్వరుడా

తప్పునొప్పు తెలియ జెప్పు ధర్మాత్ము డెవడైన
నెప్పుడైన నొక్కమాట చెప్పినప్పుడు
తప్పుబట్టి యట్టివాని తరిమివేసితిని కాన
నిప్పు డెవరిని బోయి యేమని యడుగుదు

అక్కటా యీ తనువనగ నొక్క యోటి కుండ యని
యొక్కనాడు తలపనైతి నోరయ్యో మోసపోతి
చక్కగా శృంగారించి చనువిచ్చి గారవించి
చిక్కి కాలమునకు నేడు చింతించుచుంటిని

రామరామ యని యంటె రక్షింతు వని వింటి
నీమముగ నిపుడు నేను నామము చెప్పుచుంటి
యేమైన నీవే దక్క యెవరును లేరు కావ
నా మనవి విని నీవు నన్ను కాపాడ వయ్య