రామజయం

రామ జయం శ్రీరామ జయం

రామ జయం రఘురామ జయం

రామ జయం సుశ్యామ జయం

రామ జయం శుభనామ జయం

రామ జయం గుణధామ జయం

రామ జయం మునికామ జయం

సామీరిస్తుత రామ జయం

భీమపరాక్రమ రామ జయం

కామవైరినుత రామ జయం

భూమిసుతాప్రియ రామ జయం

సేవకులము

మేము రామచంద్రసార్వభౌముని సేవకులము

మేము రామవిభునియాన నేమాత్రము మీరము

రామమంత్ర మొకటి దక్క మేముపాసించము

రామచరిత మొకటి దక్క మేము పఠియించము

రామభక్తవరుల దక్క మేము చేరబోము

రామ సేవలను దక్క మేము చేయబోము

రాముని వైభవము దక్క మేము కీర్తించము

రాముని పాదముల గాక మేమన్యము మ్రొక్కము

రాముని సత్కృపను గాక మేమన్యము కోరము

రాముని సన్నిధిని గాక మేమన్యము నొల్లము

రారా రాఘవ

రారా రాఘవ నను దరిజేర్చగ

  శ్రీరామా నీభక్తుడరా

రారా ఘనసంసారమహార్ణవ

  తారణకారణ శ్రీరామా

శ్రీరఘునందన సీతారమణా

  శ్రితజనపోషక శ్రీరామా

కారుణ్యాలయ కమలదళేక్షణ

  కామితవరదా శ్రీరామా

శూరజనేశ్వర వైరిజనాంతక

  సురగణతోషణ శ్రీరామా

వారిజలోచన బంధవిమోచన

  భవభయశోషణ శ్రీరామా 

తామరసేక్షణ దశరథనందన

  దనుజవిమర్దన శ్రీరామా

భూమిసుతావర భూపాలోత్తమ

  పుణ్యవివర్ధన శ్రీరామా

కోమలాంగ సుశ్యామలాంగ సు

  త్రామప్రశంసిత శ్రీరామా

కామారిస్తుత కమలజసంస్తుత

  కారణకారణ శ్రీరామా

ఏమి కావలెను నీకు

రామున కన్యము నేమెరుగవు యిం

కేమి కావలయు నిప్పుడు నీకు

రాముని భక్తుడ వైతివిగా

  యింకేమి కావలెను నీకు

రాముని సేవను కుదురుకొంటి

  వింకేమి కావలెను నీకు

రాముని భక్తుల మైత్రి కల్గె

  నింకేమి కావలెను నీకు

రాముని భజనకు నురుకుచుందు

  వింకేమి కావలెను నీకు

రామనామమునె పలుకు జిహ్వ

  యింకేమి కావలెను నీకు

రామతత్త్వమునె తలచు బుధ్ధి

  యింకేమి కావలెను నీకు

రామరూపమునె వలచును కను

  లింకేమి కావలెను నీకు

రామచరితమునె తడవును మది

  యింకేమి కావలెను నీకు

రామకీర్తనమె చేయు భావ

  మింకేమి కావలెను నీకు

రాముని తోడనె గడచు కాల

  మింకేమి కావలెను నీకు

రాముని పాదము వీడవుగా

  యింకేమి కావలెను నీకు

రాముని బ్రతుకున నిండించితి

  వింకేమి కావలెను నీకు

మంచితనము

మంచితనము రాముడై మహిని వెలసెను హరి

వంచు నందరు సురలు నగ్గించ మెరసెను

వనజాసనప్రభృతు లడుగ వసుధను ప్రభవించెను

జనకున కచ్చెరువుగ శివధనువు నిట్టె విరచెను

జనులందరు మెచ్చగాను జానకిని గ్రహించెను

పినతల్లికి ప్రీతిగొలుప విపినములకు బోయెను

అంతులేని యసురుల దురంతములను బాపెను

చెంత చేరి నట్టి వారి చింతల నణగించెను

పంతగించిన దశముఖుని భండనమున గూల్చెను

సంతసించ జనులెల్లరు జగమును పాలించెను

తనపేరే యసురహృద్విదారకముగ చేసెను

తన భక్తుల కెల్లప్పుడు తానండగ నిలచెను

తన యశంబు నాచంద్రతారార్కము చేసెను

తన నామము జనులకు భవతారకముగ చేసెను

నా పరిస్థితి.

మూడవ తారీఖున ఉదయం రోడ్ దాటుతుంటే స్కూటరు వచ్చి తాకి పడ్డాను. కొంచెం కముకుదెబ్బలు తగిలాయి. మాచెల్లెళ్ళు వచ్చి లాక్కుపోయారు. నాతల్లులు  వాళ్ళే నాసంరక్షణ చూస్తున్నారు శారద గతించినప్పటి నుండీ.

ఇపుడు వాళ్ళ ఇంటికి సమీపంలోనికి నన్ను మార్చాలని వాళ్ళ తీర్మానం. రెండునెలల క్రితం ఇంట్లోనే పడిపోయాను కదా. ఇపు డిది. ఇక నన్ను ఒక్కడినే బయట తిగుగనీయ వద్దని కూడా తీర్మానించారు.

శారద వెళ్ళపోయాక కొంచెం మానసికంగా దెబ్బతినటం వలన ఈఫరిస్థితి వవ్చిందేమో అని నా అనుమానం.

మొదట కొంత కులాసాగానే ఉన్నాను. మందులు వాడుతున్నాను.

క్రమంగా రెండడుగులు ముందుకూ మూడడుగలు వెనక్కీ అన్నట్లుంది నా పరిస్థితి. మందులు ఇంకా వాడుతున్నాను. మొదట కుడిచేతి x - ray తీయించారు. అది బాగుంది. కాని నొప్పులు బాగానే ఉన్నాయి. 

కాలిపరిస్థితి అంత మెరుగుకాలేదే అని డాక్టరును కలిసి మాట్లాడాము. నిన్న x- ray తీస్తే కొంచెం fracture ఉందని అన్నాడు technician. 

నిన్న మాబావగారు నా రిపోర్టులతో డాక్టరును కలిసారు. డాక్టర్ నాతో కూడా ఫోనులో మాట్లాడారు. 

కుడిమోకాలికీ పాదానికీ మధ్యభాగంలో కుడివైపున చిన్న hairline fracture అన్నారు.

ఒక ఐదారువారాలు బెడ్ రెష్ట్ అవసరం అన్నారు. మాచెల్లెలు లక్ష్మి యింట్లో ఉన్నాను.

అనవే మనసా యికనైన

అనవే హరి శరణం బనవే

అనవే మనసా యికనైన

హరి పురుషోత్తమ రామా శరణం

  బనవే మనసా యికనైన

హరి సంసారభ్రమ నిదిగో విడచితి

  ననవే మనసా యికనైన

హరి శ్రీకరమగు నీదయయే చా

  లనవే మనసా యికనైన

హరి భవతారక నీనామము చా

  లనవే మనసా యికనైన

హరి నీసచ్చరితామృతమే హిత

  మనవే మనసా యికనైన

హరి నీపాదాబ్జంబుల నుండెద

  ననవే మనసా యికనైన

హరి యతనుని స్నేహంబును వదలితి

  ననవే మనసా యికనైన

హరి యేపుణ్యము పాపంబును వ

  ద్దనవే మనసా యికనైన

హరి నీవే గతి నీవే గతి నా

  కనవే మనసా యికనైన

హరి నీసద్భక్తులె నాదేశికు

  లనవే మనసా యికనైన

హరి నిను నమ్మితి నిన్నే నమ్మితి

  ననవే మనసా యికనైన

హరి యీ యెత్తిన జన్మంబులు చా

  లనవే మనసా యికనైన

హరినామం

సరుచిరమైనది హరినామం

హరినామం సురగురునామం

పరమానందము హరినామం

పరమోత్సవము హరినామం

పరమైశ్వర్యము హరినామం

పరబ్రహ్మము హరినామం

వరముల నొసగే హరినామం

పరము నొసంగే హరినామం

మరువకు మరువకు హరినామం

మరిచిన చెడుదువు హరినామం

హరేరామ యని హరినామం

హరేకృష్ణ యని హరినామం

నిరతము పాడుము హరినామం

హర సన్నుతమగు హరినామం

హాయిగొలుపు

హాయిగొలుపు మాటలాడు 

  నట్టి నేస్తుడా నా

చేయిబట్టి నడిపించే 

  శ్రీరాముడా

యుగము లెన్ని గడచినను

జగము లెన్ని తిరిగినను

పగలురేలు నీధ్యాసనే

తగిలియుందు నిజముగ

మాయెమాయె జాయ యంటె

మాయలోన పడ కంటివి

మాయజేసే వారెవ రన

హాయిగ నిదె నవ్వితివి

నాయిల్లిది కాదనుచో

నేయిల్లన మాట్లాడవు

నీయింటికి పిలిచెదవా

ఆయూసే నీవెత్తవు

కలలలోన తోచెదవు

గలగల మాట్లాడెదవు

పిలుచు టెపుడు నన్నంటే

పలుకకుండ పోయెదవు

తారకనామము ధరను లభించగ

తారకనామము ధరను లభించగ

    యూరక నితరము లెందుకయా

చేరక కాలుని శ్రీహరి పదమును

    చేర్చెడు నామము చేయుడయా

మోక్షప్రదుడా ముకుందుడే యని

    ముందుగ చక్కగ తెలియుడయా

మోక్షము కొరకై యన్యుల వేడెడు

    మూర్ఖత దేనికి విడువుడయా

లక్షణముగ హరి లక్ష్మీనాథుని

    రామనామమును చేయుడయా

పక్షివాహనుడు నిజభక్తుల యో

     గక్షేమంబులు విడువడయా

అక్షయసంపద హరికృపయే యని

    యాత్మశుధ్ధిగ తెలియుడయా

కుక్షింభరులై తిరుగుచు ముక్తిని

    కోరుట పొసగదు తెలియుడయా

రక్షకుడకు శ్రీరాముని వేడక

    బ్రతికిన బ్రతుకొక బ్రతుకటయా

త్ర్యక్షుడు నిత్యము తారకనామము

    ననిశము ధ్యానము చేయునయా

    

హరే హరే సంసారనివారణ

హరే హరే సంసారనివారణ

శరణాగతజనసంపోషణచణ

శ్రీరఘురామ హరే గోవింద సీతారామ హరే

నారదవినుత హరే గోవింద నారాయణ నృహరే

దేవాధిదేవ హరే గోవింద దివ్యప్రభావ హరే

పావననామ హరే గోవింద పట్టాభిరామ హరే

కోదండరామ హరే గోవింద కువలయనేత్ర హరే

వేదాంతవేద్య హరే గోవింద వీరాధివీర హరే

అనాథనాథ హరే గోవింద అనింద్యకీర్తి హరే

వినాశహీన హరే గోవింద విమలచరిత్ర హరే

దశరథపుత్ర హరే గోవింద దయామృతాబ్ధి హరే

దశముఖనాశ హరే గోవింద ధర్మస్వరూప హరే

పాపవినాశ హరే గోవింద భవభయనాశ హరే 

గోపాలదేవ హరే గోవింద కువలయనేత్ర హరే

తెలిసియుండి

అన్నీ నీకు తెలిసియుండి యడుగ నేల నిటుల

కొన్ని కొన్ని మరల వినగ కుతూహలము కాక

అందరిలో నింతవాడ వంతవాడ వని పొగడిన

విందును మరి యొక్కసారి వినిపించు మనక

అందరి గడబిడల మధ్య నంత సరిగ వినలేదు

ఇందిరయును వినగోరెడు నిపుడు తెలుపు మందువే

ఎందుకయా మోక్ష మనుచు నింత యంగలార్తు వని

యందువు నను కికురించగ నదియే రామా

వందారు సద్భక్తజనమందార నాకోరిక

యుందును నీమ్రోల నని యొక వేయిమార్లంటి

చక్కని నాటకము

చక్కని నాటకము బహు

చిక్కని నాటకము

మిక్కిలి నేర్పుతో మెలగుచు బ్రహ్మయ్య

చక్కగ నడిపించు స్వామి రచించిన

ఎన్నెన్నో పాత్రల వన్నియు తిన్నగ

వెన్నుని యానతి నెన్ని నటించెడు

చిన్నచిన్న కథలు చిక్కుముడుల కథలు

ఎన్నో పెద్దకథలు నెన్నెన్నో మళుపుల

ఆడించు వానికిని యాడు వారలకును

కూడ తన పోకడల గూర్చియే తెలియని 

ఆడించునది వాడె ఆట యంతయు వాడె

యాడుచున్నది వాడె అన్నిపాత్రల దూరి

మొన్న రాముడై వాడె నిన్న కృష్ణుడై వాడె

తిన్నగ జొరబడి మిన్నగ నడిపిన

శరణుజొచ్చితి

శరణుజొచ్చితిని రామా శరణుజొచ్చితి

పురుషోత్తమ నిన్నే శరణుజొచ్చితి

కరవరదుడ వగు నిన్ను శరణుజొచ్చితి

వరదాయక నిన్నే శరణుజొచ్చితి

శరణాగతత్రాణ బిరుదాంకితుడ వీవు

శరణమీయవో యెవని శరణుజొత్తును

పురహరనుత నిన్ను శరణుజొచ్చితి

పరమాత్మ నిన్నే శరణుజొచ్చితి

నిరుపమాన విక్రమ శరణుజొచ్చితి

ధరాసుతాపతి నిను శరణుజొచ్చితి

కరుణాలవాల నిన్ను శరణుజొచ్చితి

నరసింహా నిన్నే శరణుజొచ్చితి

పరమేశ్వరుడ వీవు శరణంబు నీయవో

మరి యెవ్వరి నిప్పుడు శరణుజొత్తును