రామరామ యనవే

రామరామ యనవే శ్రీ

  రామరామ యనవే రఘు

రామరామ యనవే జయ

  రామరామ యనవే

రామనామనిత్యజప

  పరాయణుడను నే ననవే

రామనామ మొకటి చాలు 

  రక్షించగ నన్ననవే

కాము డనే వాడు నా

  కడకు రాడు పొమ్మనవే

ఏమరియును నితరుల నే

  నెంచబోను పొమ్మనవే

రాముడు గా కితరుల

  నారాధించను పొమ్మనవే

రాముని చరితమును గా

  కేమి చదువ బొమ్మనవే

రామునితో గాక మాట

  లాడ బోను పొమ్మనవే

ఓమనసా రామునొకనె

  ప్రేమించెద నేననవే

రామభజన చేయువారి 

  కేమి భయము లేదనవే

రాము డున్నచోట శుభ

  పరంపరలే లెమ్మనవే

రాముడే భగవంతుడని

  భూమి మీదను చాటవే

ప్రేమతోడ మోక్షమిచ్చు 

  రాముడొకడు చాలనవే

వచ్చితినయ్యా

వచ్చితినయ్యా వచ్చితినయ్యా 
  వచ్చితినయ్యా రామయ్యా
వచ్చితినయ్యా నిన్నుచూడగా
  వచ్చితి సీతారామయ్యా

మెచ్చి నీవు వర మిచ్చెద వనుకొని

  వచ్చితి ననుకొన వలదయ్యా

ఇచ్చుట మానుట నీయిష్టమురా

  యినకువతిలకా రామయ్యా

గ్రుచ్చి యెత్తి నను కౌగలించుకొని

   కుశలం బడిగొదొ రామయ్యా

గ్రుచ్చి గ్రుచ్చి నీకోరచూపులతొ

   కుళ్ళబొడిచెదవొ రామయ్యా

ముచ్చటగా నీగోత్రనామముల

  నిచ్చట మార్చుట వింటినిరా

హెచ్చుగ కటకటపడి భద్రాద్రి

   ముచ్చట తలపక యుంటినిరా

మెచ్చని నీవును శ్రీరఘునాయక

   మిన్నకుండుటను చూచితిరా

ముచ్చటగా నాహృక్షేత్రమునకు

   విచ్చేయుమురా విహరింప

నిచ్చలు సీతారాముడ వని నిను

   ముచ్చటగా నే కొలిచెదరా

చచ్చు తెలివి నీగోత్రనామముల

   సరిదిద్దక నే కొలిచెదరా

అచ్చపు తెలివిడి నన్నివేళలను

   హరి సర్వాత్మక కొలిచెదరా

మచ్చరించ హర బ్రహ్మాదులు మన

   సిచ్చి నిన్ను సేవింతునురా

వివరింపవే

వివరింపవే బాగ వివరింపవే మనస
శ్రవణసుభగంబుగా వివరింపవే

నారాయణుని దివ్యనామామృతము చాలు

వేరేల పల్క నని వివరింపవే

నారాయణుని చరణంబులే చాలునే

వేరేల మ్రొక్క నని వివరింపవే

నారాయణుని పద్మనయనంబులే చాలు

వేరేల చూడ నని వివరింపవే

నారయణుని కరుణ నాకు గల్గిన చాలు

వేరేల కోర నని వివరింపవే

నారాయణుని కథల నాలకించిన చాలు

వేరేల వినగ నని వివరింపవే

నారాయణుని యర్చనంబు చేసిన చాలు

వేరేల చేయ నని వివరింపవే

నారాయణుడు చాలు నారాయణుడు చాలు

వేరేల దైవ మని వివరింపవే

నారాయణుని రామనామ మొక్కటి చాలు

వేరేల తరియింప వివరింపవే

రక్షరక్ష

రక్షరక్ష యని వేడుచుంటి శ్రీరామ బ్రోవవయ్యా
రక్షకు డింకొక డెవ్వడు లేడు నిరాకరించ కయ్యా

రక్షరక్ష శ్రీరామచంద్ర హరి కుక్షిస్థాఖిలభువన

రక్షరక్ష హరి సీతానాయక రామచంద్రవదన

రక్షరక్ష సురగణపరిపాలన రాక్షసగణహరణ 

రక్షరక్ష హరి భక్తజనావన రామలోకశరణ

రక్షరక్ష భవతారణనిపుణ పక్షిరాజగమన

రక్షరక్ష హరి సత్యపరాక్రమ రామసర్వశరణ

రక్షరక్ష సంసారనివారణ రామపాపహరణ

రక్షరక్ష హరి కారణకారణ రామ పరబ్రహ్మ

రక్షరక్ష శ్రీరామా జగదారాధితశుభచరణ

రక్షరక్ష శ్రీరామా సంసారార్ణవైకతరణ

రక్షరక్ష శ్రీరామా రాఘవ రాజకులాభరణ 

రక్షరక్ష శ్రీరామా హరి నారాయణ భవహరణ

రామరామ

రామరామ రామరామ రామరామ రామరామ
రామరామ రామరామ రామ రాఘవా

రామ రవికులాబ్ధిసోమ రామ సకల సుగుణధామ

రామరామ మునిజనైకకామ రాఘవా

రామరామ సీతారామ రామరామ కృపాధామ

రామరామ శ్రీవికుంఠధామ రాఘవా

రామ నీలమేఘశ్యామ రామ మునిమనోభిరామ 

రామరామ హరసన్నుతనామ రాఘవా

రామరామ రాజారామ రామరామ విజయరామ

రామరామ దైత్యగణవిరామ రాఘవా

రామ తాపశమననామ రామ పాపహరణనామ

రామరామ వరవితరణనామ రాఘవా

రామరామ ఆప్తకామ రామరామ పరంధామ

రామరామ భవతారకనామ రాఘవా

ఆనందము

హరియే యానందకరుం డగుట చేతనే

హరియే యానందరూపు డగుట చేతనే

హరే రామ యనుట లోన నానంద మున్నది

హరే కృష్ణ యనుట లోన నానంద మున్నది

హరి నామము పలుకుటలో నానంద మున్నది

హరిని తలచు కొనుట లోన నానంద మున్నది

హరి కీర్తన పాడుటలో నానంద మున్నది

హరి పూజలు చేయుటలో నానంద మున్నది

హరికి సేవ చేయుటలో నానంద మున్నది

హరి తత్త్వము చాటుటలో నానంద మున్నది

హరి కథలను వినుటలోన నానంద మున్నది

హరిదాసుల కలయుటలో నానంద మున్నది

హరికి భక్తు డగుట లోన నానంద మున్నది

హరి కన్యము నెఱుగ కున్న నానంద మున్నది

తామస మిది నీకెందుకు

తామస మిది నీకెందుకు దశరథతనయా నా
కోమలికై నేనేడ్చిన కోమలహృదయా

నీకోమలి దూరమైన నీకేడుపు రాగా
నాకోమలి దూరమైన నాకేడుపు రాదా
ఏకాంతునకైన సుదతి యెంతయు ప్రియురాలే
నీకు నాకు భేదమేమి నిజముగా నిచ్చట

లోకములో మనకిటుల శోక మొక్కటైన 
నీకాంతను తిరిగిపొంద నీకు చెల్లెను కాని
నాకాంతను తిరిగిపొంద నాకు చెల్లదు కదా
నీకు నాకు భేదమిదే నిజముగా నిచ్చట 

తిరిగి రాదు కదా

ఏమని విలపించినను రామచంద్రుడా

ఆమె తిరిగి రాదు కదా రామచంద్రుడా

ఆమె బాధలను చూచుచు రామచంద్రుడా

నామనసున కష్టపడితి రామచంద్రుడా

ఆమె బాధలకు విముక్తి రామచంద్రుడా

ప్రేమ మీర కోరితి నిను రామచంద్రుడా

ఆమె దూరమాయె ననుచు రామచంద్రుడా

ఏమో యిపు డేడ్చుచుంటి రామచంద్రుడా

ఈ మనోవేదన కన రామచంద్రుడా

ఏమి తెరపి లేదాయెను రామచంద్రుడా

ఆమె సుమంగళిగ జనగ రామచంద్రుడా

వేమరు వేడినది కదా రామచంద్రుడా

ఆమె కోరికయె తీరె రామచంద్రుడా

ఆమె ప్రశాంతముగ జనె రామచంద్రుడా

కోమలి శారదకు లోటు రామచంద్రుడా

ఏమి వచ్చినది స్వామి రామచంద్రుడా

ఆమెలేని జీవితమై రామచంద్రుడా

నా మనసే కృంగిపోయె రామచంద్రుడా

ఏమిటింత యధీరుడను రామచంద్రుడా

ఏమాయెను నాతెలివిడి రామచంద్రుడా

ఈమాయామయజగమున రామచంద్రుడా

నీమహిమయె సత్యమయ్య రామచంద్రుడా

రామచంద్రుడా సీతారామచంద్రుడా

నామనసున శాంతి నింపి రామచంద్రుడా

ప్రేమతోడ నన్నేలుము రామచంద్రుడా

ఓమహాత్మ దండమయ్య రామచంద్రుడా

హరిని రాముని

ఆరాధించెదను నేను హరిని రాముని 

వేరొక్కని గొలుచునంత వెర్రిని కాను

పరవశించి పొగడెదను హరిని రాముని

నిరుపమాన కీర్తి గల హరిని రాముని

వరములిచ్చు దేవుడగు హరిని రాముని

కరుణగల స్వామి యగు హరిని రాముని

నరాకృతిని తోచుచున్న హరిని రాముని

సురవైరుల పీచమడచు హరిని రాముని 

ధరణిజతో కలిసియున్న హరిని రాముని

పరమపురుషుడైన మన హరిని రాముని

తిరముగా నమ్మి నేను హరిని రాముని

పరమపదము నొసంగెడు హరిని రాముని

పరమపదమె వేడెదను హరిని రాముని

మరలమరల వేడెదను హరిని రాముని

ఫలవిచారణ

ఫలవిచారణ బాగుగ చేయని పని దండుగ యని తెలియుడయా
తెలిసి తెలిసి సత్ఫలముల నొసగు పనులనే చేయుడు జనులారా

వెన్నుని పొగడక వేరెవ్వరినో యెన్ని నుతించిన ఫలమేమి
వెన్నుని కరుణకు నోచక నితరుల మన్నన పొందిన ఫలమేమి
వెన్నుని గాంచగ నొల్లక నితరుల కన్నుల జూచిన ఫలమేమి
వెన్నుని నామము పలుకక నాలుక యెన్ని నుడివినను ఫలమేమి

వెన్నుని దాసుల గొలువక నితరుల పన్నుగ గొలిచిన ఫలమేమి
వెన్నుని భక్తుల కీయక నితరుల కెన్ని యొసగినను ఫలమేమి
వెన్నుని తత్త్వము చింతన చేయక నెన్నో తడవిన ఫలమేమి
వెన్నుని చేరెడు చింతన గాకను వెర్రి చింతనల ఫలమేమి

తిన్నగ రాముని వెన్నుడటంచును తెలుపని విద్యల ఫలమేమి

ఉన్నన్నాళ్ళును రాముని భటుడై యుండక బ్రతికిన ఫలమేమి

వెన్నుని కాదని యితరుల గొలుచుచు నున్న బ్రతుకునకు ఫలమేమి

వెన్నుని మోక్షం బొక్కటి యడుగక నెన్నో వేడిన ఫలమేమి

కాముని స్నేహము

కాముని స్నేహము మరగిన జీవుడు

    రాముని మరచును దేవా

రాముని సంగతి మరచిన జీవుడు

    భూమికి బరువగు దేవా

భూమికి బరువై బ్రతుకుట కన్నను

    పోల్చగ హీనత కలదే

వేమరు పుట్టియు వేమరు చచ్చియు

    కాముని స్నేహము విడడే

కాముని స్నేహము విడిచెడు దాకను

    రాముడు స్మరణకు రాడే

రాముడు స్మరణకు వచ్చెడు దాకను

    యేమియు లాభము లేదే

కాముడు తన చేజిక్కిన వానిని

    యేమిటికని పొమ్మనును

యేమో కాలము గడువగ గడువగ

    కాముని స్నేహము వెగటై

రాముని నామం బింపుగ వినబడి

    రాముడు ప్రియుడని తోచును

రాముడు ప్రియుడను జీవుని గ్రక్కున

    కాముడు విడచుట తథ్యము 

హరేరామ యను

హరేరామ యను వారికి కలుగును సరాసరి మోక్షం బాబూ

పరాకు పడితే కల్లదైవముల పాలైతే కష్టం 

కలియుగ మందున కొల్లలు కొల్లలు కల్లగురువులు నీచుట్టూ

కలికమునకును నిజమే లేని కల్లబొల్లి దుర్బోధలతో

నిలువున ముంచే మాయవిద్యలతో నిన్నాకర్షించుట తథ్యం 

ఉలకక పలుకక రామరామ యని ఉపేక్షీంచుటే మార్గం

వెలిసేరయ్యా ఊరూరా బహువిచిత్రమైన దేవుళ్ళు 

కలవని మహిమలు కల్లగురువులు ఘనముగ బాకాలూదేరు

కలుగును సిరులని కలుగు మోక్షమని కల్ల ఋజువులే చూపేరు

తలయూచక శ్రీరామరామ యని నిలువరించుటే మార్గం 

శివుడిచ్చిన శ్రీరామనామమును చేయుట కన్నను మేలేది

భవతారకఘనమంత్రము కన్నను పవిత్రమైనది వేరేది

వివేకవంతుడు రామనామమును విడిచిపెట్టుటను మాటేది

పవమానాత్మజ రామదాసుల బాటకంటెను దారేది

రామరామ

రామరామ సీతారామ 

రామరామ రాజారామ

రామరామ యినకులాబ్ధిసోమ మంగళనామ

రామరామ భూమిసుతాకామ మంగళనామ 

రామరామ లోకాభిరామ మంగళనామ

రామరామ మునిగణైకకామ మంగళనామ

రామరామ సమరాంగణభీమ మంగళనామ 

రామరామ సర్వవినుతనామ మంగళనామ

రామరామ హరిపరంధామ మంగళనామ

రామరామ భవతారకనామ మంగళనామ

ఎంత విచారించినా

ఎంత విచారించినా యింతి తిరిగివచ్చునా

ఎంత ప్రయత్నించినా యింతి మరపువచ్చునా

నేలపైన నన్ను విడచి నింగి కెగసె శారద

కాలగర్భమున కలిసె గాఢానుబంధము

కాలువలుగ నేడ్చినా కనికరించునా విధి

జాలి లేదు కద దానికి సాకేతరామా

మున్నే చనవలయునని ముదిత కోరుకొన్నది

ఎన్నగ నది సహజమే యీగేహినులకును

అన్నాతిని కోలుపడితి నన్నవిచారంబున

నున్న నాకు మనశ్శాంతి నొసగుమా రామా

యింతి దూరమైనదా

ఎంత తెలిసియున్న గాని యింతి దూరమైనదా

యింతిం తనరాదు బాధ యేమందువు రామ

పదుగురును బహుస్వాంతనవచనంబుల పలుకగా

అదుముకొనినకొలది దుఃఖ మతిశయించు చుండును

పదుగురిలో మసలుచుండి బాధమరిచి నటులుగా

పదేపదే నటియించుట వలనుపడక యుండును

తనవారై యెందరున్న  తరుణి దూరమైన బాధ

మనసు నేర్చుచుండ తనకు మనక తప్పకుండును

కోరిన కోరిక

కోరిన కోరిక తీరెను సుదతికి 

గౌరీలోకము చేరెను శారద

శోధన చాలించుమనుచు వేడగ

బాధలు తీరెను పడతికి నేటికి

గాథగ మిగులగ కమలలోచన య

నాథుడ నైతిని నను గనరా

చింతించెదనో శ్రీపతి యిక నా

యింతి లేదనుచు హృదయావేదన

యింతింతన రానిదియై యెగయగ

సంతోషింతునొ సతి తరించెనని

ధీరత చెడి బహుదీనుడ నైతిని

శ్రీరామా నాచింతను దీర్చర

కారణకారణ కరుణించర సం

సారమహార్ణవతారణకారణ

తప్పులెన్నో

తప్పులెన్నో జరుగునయా దశరథ రామా మే

మొప్పులకుప్పలము కాకుండుట వలన

ఆశలతో సతమతం బగు టొక తప్పు దు

రాశలకు లొంగిపోవు టతిపెద్ద తప్పు

లేశమును సద్బుద్ధియె లేని మా బ్రతుకిది

కాశిలో చచ్చినా నరకమును పొందు బ్రతుకు

వరుసపెట్టి లెక్కించ పనిలేదు కనుగొన

హరి మేము పుట్టుటయే అసలైన తప్పు 

మరిమరి యీ తప్పుల మా కంటగట్టక

పరమపురుష నీవద్ద పడియుండనిమ్ము

రామ రామ

రామ రామ రామ సీతారామ రామ రామ శ్రీ

రామ రామ రామ రాజారామ రామ రామ

రామ సకలసుగుణధామ రామ సార్వభౌమ శ్రీ

రామ సంసారార్తిశమననామ పరంధామ

రామ ఆప్తకామ యోగిరాజగణసుపూజ్య శ్రీ

రామ కామవైరివినుతనామ పరంధామ

రామ సురవిరోధిగణవిరామ సమరభీమ శ్రీ 

రామ సూర్యవంశజలధిసోమ పరంధామ

రామరామ శ్రీరామరామ యని

రామరామ శ్రీరామరామ యని

    రామనామమే పలుకుమురా

రామనామమును పలుకువారితో

    ప్రాణస్నేహము నెఱుపుమురా

రామనామసంకీర్తన మధురిమ

    కేమియు సాటిగ నిలువదురా

రామనామసంకీర్తన చేసిన

    క్షేమము ధైర్యము కలుగునురా

రామనాముమును పాడెడు వారికి

    స్వామి హనుమయే తోడగురా

ఆమారుతియే తోడై యుండగ

    నన్నిట నీదే విజయమురా

నీమముగా శ్రీరామనామమే

    నిత్యము పలుకుచు నుండుమురా

రాముని కృప సిధ్ధించునురా

    రాముడు నీతో పలుకునురా

రామనామమున సర్వజనులకు

    కామితఫలములు కలుగునురా

ప్రేమగ రామా రామా యంటే

    రాముడు నీవాడే యగురా

రామనామమున జేసి మోక్షమే

    భూమిని జనులకు గలుగునురా

రామనాముమును గాక నన్యముల

    నేమేమో యిక పలుకకురా

చాల మంచివాడనో

చాల మంచివాడనో చాల చెడ్డవాడనో

కాలమునకు వదిలి నీ కడ నుండనీ

నీ పాదముల నంటి నేను నిలచి యున్నచో

ఏ పాపమును లేదు ఏ పుణ్యమును లేదు 

ఏ పుట్టువులు లేవు ఏ చావులును లేవు

ఏ పాడు భయహేతువు నెప్పుడు లేదు

నీ కాలి యందియలో నేనొక్క మువ్వ నైన

ఏ కర్మమును లేదు ఏ ధర్మమును లేదు

ఏ కిల్బిషము లేదు ఏ కష్టమును లేదు

నాకింక వేరేమి లోకమును లేదు

రామయ్య నీపాదరాజీవములను నేను

ప్రేమతో నిత్యము సేవించుచు నే యుండుట

నేనేమో కోరగ నేమంత వెంగళిని

స్వామి నీచరణమే శరణమందు నయ్య

శారద

రాముడు నాప్రాణమైతే రమణి నీవే నేను
కోమలి నీ వెట కేగిన నామది నున్నావు

నాకు సత్కీర్తిగ నలుగురితో పలికితి వని

నాకు నేడు తెలియవవ్చె నారీశిరోమణి

నీకు వందనములను నేను చేయరాదు

నీ కీర్తిని చాటుటకై నేను పలుకవచ్చు

పూను కొని నాచేతను పుణ్యకార్యమ్ములు 

మానిని చేయించితివి మాయింటి వెలుగ

నేను నీవు లేక నేడు నిస్తేజుడ నైతిని

నీ నిజతేజ మింక నిలుచు గాక నాలో

ఓ సుశీల శారదా యొక్క సారి నిన్ను

చూసుకొన రాదాయెను సుదతి కలలలోన

నీ సుమనోహరాకృతిని చూచుభాగ్యమ్మును

గాసిపడిన మనసునకు కలిగించును నీవు

ఎంత తెలిసిన గాని

ఎంత తెలిసిన గాని యించుకంతయు రామ
చింతనము లేనట్టి జీవులున్నారు

హరిశాస్త్రములు దక్క నన్యంబు లెన్నియో
కరతలామలకమౌ ఘను లెందరో
ధరమీద నున్నారు తరచుగా తమ సాటి
నరు లెవ్వరనుకొనుచు తిరుగుచున్నారు

హరినామములు దక్క నన్యదైవంబుల
స్మరియించు కొనుచుంచు జడులెందరో
తరియించు తున్నాము తామన్న భ్రమలోన
పరమునకు కాకుండ బ్రతుకుచున్నారు

హరిగతి

ఇంతకు నేవిధి చింతించుటయో

    యెంతగ తరిచిన తెలియక యున్నది

అంతే తెలియని తనం తత్త్వంబును

     చింతించుట నావశమెటులగును

కొందరు నీలశరీరుం డందురు 
    కొందరు నీలగ్రీవుం డందురు
కొందరు నాగశయనానుం డందురు 

    కొందరు నాగాభరణుం డందురు
కొంద రలంకారప్రియు డందురు 

    కొంద రభిషేక ప్రియుడని యందురు
కొందరు చక్రాయుధు డని యందురు 

    కొందరు శూలాయుధు డని యందురు
కొందరు తాను సురాశ్రయు డందురు 

    కొంద తాన సురాశ్రయు డందురు
కొందరు గంగాజనకుం డందురు 

    కొందరు గంగాధరు డని యందురు
కొందరు మదనుని జనకుం డందురు 

    కొందరు మదనవిరోధి సుమందురు
కొందరు స్థితికారకు డని యందురు 

    కొందరు లయకారకు డని యందురు
కొందరు దుర్గకు సోదరు డందురు 

    కొందరు దుర్గానాథుం డందురు
కొందరు హరిహరి యనుచు నుతింతురు 

    కొందరు హరహర యనుచు నుతింతురు
కొందరు రామబ్రహ్మం బందురు 

    కొందరు రామోపాసకు డందురు
కొందరు హరిహరు లొక్కటి యందురు 

    కొందరు తెలియక ముక్తికి చెడుదురు

బ్రతికి యున్నందు కేమి ఫలము

బ్రతికి యున్నందు కేమి ఫలము మనకు సీతా
పతిని కొలువకున్న నేమి ఫలము మనకు

చీమ లెన్ని పుట్టవు చిలువ లెన్ని పుట్టవు

దోమ లెన్ని పుట్టవు భూమి నెల్ల వేళల

భూమి మీద నరునిగ పుట్టి లాభ మున్నదా

రామనామ మెన్నని బ్రతుకొకటి బ్రతికిన

ఘనత కాదు కాదని కాసు లిన్ని కలుగుట

వనిత సర్వ మనుకొని ఫలిత మేమి లేదని

మనసు కెఱుక కానిది మనిషి ప్రీతిమీఱగ

ఇనకులపతి నామమే యెన్నకను బ్రతికిన

అతులితమై సిరియున్న నది యుధ్ధరించునా

వ్రతము లెన్ని చేసిన ఫలిత మెంత కలుగును

శ్రుతులు కంఠగతమై సొరిది మోక్షమబ్బునా

సతతము రామనామస్మరణ లేక బ్రతికిన

హరి నీనామమె

హరి నీనామమె యమృతము నీ
కరుణయె నాకు ఘనవరము

వచ్చును పోవు నుపాధులు హరి నా
కిచ్చట ధరపై నెన్నెన్నో
యెచ్చట నున్నను యెటులున్నను  బహు
ముచ్చట నీదయ వచ్చుట యేరా

సురలకు చిక్కిన సురతో వారికి
దొరికిన భాగ్యం చెందాక
పొరి కల్పాంతము వరకే నాకో
సరిసరి పుట్టుట చచ్చుట కలదా

ఇమ్మహి పుట్టువు లిక చాలును రా
రమ్మని నీవను నందాక 
గుమ్ముగ నీనామమ్మును పలుకుచు
గ్రుమ్మరు భాగ్యమె కోరెద దేవా

పరమపురుష

పరమపురుష రఘువర శ్రీరామా
హరి నిను కొలిచెద నయ్యా దేవా 

మునిజనసన్నుత మోహనాంగ హరి

జనకసుతాప్రియ సారసాక్ష హరి

దనుజనాథఘనదర్పాంతక హరి

మనుజేశ్వరకులమాన్య శ్రీహరి

భువనము లన్నియు పోషించెడు హరి

పవనసుతార్చిత పాదపద్మ హరి

వివరముగా నా వెత లెరిగిన హరి

భవదుర్భరభయవారణ శ్రీహరి

సురవైరి కొడుకును కరుణించిన హరి

కరి మొర విని వెస పరువులిడిన హరి

తరచుగ భక్తుల దరిజేర్చెడు హరి

నిరతము నను దయ నేలెడు శ్రీహరి