తిరిగి రాదు కదా

ఏమని విలపించినను రామచంద్రుడా

ఆమె తిరిగి రాదు కదా రామచంద్రుడా

ఆమె బాధలను చూచుచు రామచంద్రుడా

నామనసున కష్టపడితి రామచంద్రుడా

ఆమె బాధలకు విముక్తి రామచంద్రుడా

ప్రేమ మీర కోరితి నిను రామచంద్రుడా

ఆమె దూరమాయె ననుచు రామచంద్రుడా

ఏమో యిపు డేడ్చుచుంటి రామచంద్రుడా

ఈ మనోవేదన కన రామచంద్రుడా

ఏమి తెరపి లేదాయెను రామచంద్రుడా

ఆమె సుమంగళిగ జనగ రామచంద్రుడా

వేమరు వేడినది కదా రామచంద్రుడా

ఆమె కోరికయె తీరె రామచంద్రుడా

ఆమె ప్రశాంతముగ జనె రామచంద్రుడా

కోమలి శారదకు లోటు రామచంద్రుడా

ఏమి వచ్చినది స్వామి రామచంద్రుడా

ఆమెలేని జీవితమై రామచంద్రుడా

నా మనసే కృంగిపోయె రామచంద్రుడా

ఏమిటింత యధీరుడను రామచంద్రుడా

ఏమాయెను నాతెలివిడి రామచంద్రుడా

ఈమాయామయజగమున రామచంద్రుడా

నీమహిమయె సత్యమయ్య రామచంద్రుడా

రామచంద్రుడా సీతారామచంద్రుడా

నామనసున శాంతి నింపి రామచంద్రుడా

ప్రేమతోడ నన్నేలుము రామచంద్రుడా

ఓమహాత్మ దండమయ్య రామచంద్రుడా